៤ចំណុចនេះបញ្ជាក់ថា ទំនាក់ទំនងផ្អែមល្ហែមរបស់អ្នក ជៀសមិនរួចពីផ្លូវបំបែក
វាជារឿងជៀសមិនផុតនោះទេ ក្នុងការចាប់ដៃគ្នាសាងអនាគតរវាង មនុស្សប្រុស និង ស្រី។ ប៉ុន្តែទម្រាំអាចឈានដល់ដំណាក់កាលនៃការរួមរស់ជាមួយគ្នានោះ គឺវាមិនមែនជារឿងងាយនោះទេ ព្រោះ កាលណាមនុស្សពីរនាក់អាចចាប់ដៃគ្នាយូរអង្វែងទាល់តែ ពួកគេមានចំណុចស្រដៀងគ្នាច្រើន ជាពិសេសនោះគឺការចេះអធ្យាស្រ័យឲ្យគ្នាខ្ពស់បំផុត បើមិនដូច្នោះទេ ទំនាក់ទំនងនឹងត្រូវរលាយទៅវិញយ៉ាងរហ័សបំផុត។
ខាងក្រោមនេះ គឺជាហេតុផលមួយចំនួនដែលបញ្ជាក់ថា ទំនាក់ទំនងរបស់អ្នកមិនអាចរក្សាយូរអង្វែងបានឡើយ៖
១) មិនអាចទទួលយកអត្តចរិតរបស់គ្នាទៅវិញទៅមក៖ មនុស្សម្នាក់ៗសុទ្ធតែ មានអត្តចរិត និង បែបបទនៃការរស់នៅផ្សេងៗគ្នា។ ក្នុងគ្រាដំបូងដែល មនុស្សពីរនាក់ចាប់ផ្តើមមានអារម្មណ៍លើគ្នា ពួកគេមិនបានគិតលើអ្វីច្រើននោះទេ ពោលគឺគ្រាន់តែព្យាយាមធ្វើយ៉ាងណាដើម្បីអាចមានភាពស្និទ្ធស្នាលជាមួយគ្នាសិន។ លុះដល់ពួកគេកាន់តែស្គាល់គ្នាច្បាស់ទៅ ក៏ចាប់ផ្តើមដឹងអំពីចំណុចអាក្រក់រៀងៗខ្លួន។ ពេលខ្លះមិនមែនដោយសារតែ នរណាម្នាក់មានចំណុចអាក្រក់អ្វីខ្លាំងពេកនោះទេ គ្រាន់តែវាខុសនឹងអ្វីដែលម្នាក់ក្នុងចំណោមពួកគេចង់បានប៉ុណ្ណោះជាហេតុនាំឲ្យមានភាពរកាំរកូសជាមួយគ្នា។ នៅពេលស្គាល់គ្នាកាន់តែយូរទៅ ម្នាក់ៗចាប់ផ្តើមបង្ហាញពីអត្តចរិតពិតរបស់ខ្លួន ហើយចង់ឲ្យដៃគូទទួលយកអ្វីដែលជារបស់ខ្លួន។ ក្នុងស្ថានភាពនេះ បើម្ខាងមិនអាចទទួលយកបានទេ នោះមានន័យថា ទំនាក់ទំនងនេះនឹងរលាយទៅវិញ។
២) ខ្វះការអធ្យាស្រ័យ៖ មនុស្សពីរនាក់ដែលចង់សាងទំនាក់ទំនងដ៏យូរអង្វែងបាននោះ គឺវាពិតជាមិនអាចខ្វះនូវការអធ្យាស្រ័យបាននោះទេ។ ប៉ុន្តែក្នុងភាពជាក់ស្តែង ប្រសិនបើនរណាម្នាក់ក្នុងចំណោមអ្នកទាំងពីរ តែង «ប៉ះដៃយកដៃប៉ះជើងយកជើង»នោះពិតជាមិនអាចបន្តដំណើរឆ្ពោះទៅរកសុភមង្គលក្នុងការសាងជីវិតគ្រួសារបានឡើយ។
៣) ខ្វះការយកចិត្តទុកដាក់៖ ការយកចិត្តទុកដាក់របស់ជីវិតគូស្នេហ៍ខ្លះ គឺល្អតែដំបូងៗប៉ុណ្ណោះ លុះដល់គ្រាបន្តបន្ទាប់ក៏ចាប់ផ្តើមថយទៅវិញ។ ពេលខ្លះមិនមែនមានន័យថា ពួកគេឈប់ត្រូវការគ្នានោះទេ គ្រាន់តែដោយសារតែការរវល់នឹងការងារ ឬ ការសិក្សាជាដើម ធ្វើឲ្យទំនាក់ទំនងរបស់អ្នកទាំងពីរហាក់រយាលបន្តិច។ ចំណុចនេះហើយ អាចធ្វើឲ្យម្នាក់ក្នុងចំណោមពួកគេគិតថា ដៃគូរបស់ខ្លួនឈប់ស្រលាញ់ ហើយភាពរង្គោះរង្គើអាចនឹងចាប់ផ្តើមបន្តិចម្តងៗ។
៤) គ្មានភាពស្មោះត្រង់៖ មនុស្សពីរនាក់អាចរស់នៅជាមួយគ្នាបានយូរអង្វែង គឺត្រូវមើលលើភាពស្មោះត្រង់ជាសំខាន់។ ដូច្នេះហើយ បើម្នាក់ណាក្នុងចំណោមពួកគេមិនមានភាពស្មោះត្រង់ទេនោះ វានឹងបង្កឲ្យទំនាក់ទំនងឈានដល់ផ្លូវបំបែក ព្រោះគ្មាននរណាម្នាក់អាចទ្រាំដើរកាន់ដៃសាងវិថីជីវិត ជាមួយមនុស្សក្បត់បានឡើយ៕
ដោយ៖ អ៊ុន ភក្តី ប្រភព៖ hubpages.com, www.lifehack.org & lifeasahuman.com
