ប្រិយមិត្ត​ជាច្រើន​ប្រហែល​បាន​ដឹង​ពី​តម្លៃ​ទូរស័ព្ទ iPhone SE ដែល Apple ទើប​ប្រកាស​ចេញ​នេះ​ហើយ។ iPhone អេក្រង់ ៤អ៊ីញ​ត្រូវ​បាន​ផលិត​ឡើង ជាមួយ​តម្លៃ​ដាក់​លក់​ទាប​ចាប់ពី ៤០០ដុល្លារ​ប៉ុណ្ណោះ។ ចំណែក​ពេល​នេះ លោក​អ្នក​អាច​នឹង​ភ្ញាក់ផ្អើល​ជាមួយ iPhone SE ​ដែល​ស្រោប​មាស​នេះ គឺ​វា​មាន​តម្លៃ​រហូត​ដល់ ៥៤៤០០ផោន ឬ​ប្រហែល ៧៦៨៤០ដុល្លារ។ ហេតុផល​ធ្វើ​ឱ្យ iPhone SE មាន​តម្លៃ​ខ្លួន​កប់​ពពក​នេះ គឺ​ដោយសារ​វា​ត្រូវ​បាន​គេ​ឌីហ្សាញ ដោយ​ស្រោប​មាស​សុទ្ធ ២៤ការ៉ាត់ (មាស​សុទ្ធ ១០០%) ពី​ក្រុមហ៊ុន Goldgenie។ សូម​បញ្ជាក់​ថា Goldgenie ត្រូវ​បាន​គេ​ស្គាល់​ថា ជា​ក្រុមហ៊ុន​ដែល​តែងតែ​យក​ផលិតផល​របស់ Apple មក​រចនា​ស្រោប​គ្រៀង​អលង្ការ​មាន​តម្លៃ ទាំង​មាស និង​ពេជ្រ។ ហើយ iPhone SE ​ក៏​ជា​ផលិតផល​មួយ​ក្នុង​ចំណោម​នោះ​ផង​ដែរ ដែល​ត្រូវ​បាន​ក្រុមហ៊ុន​ស្រោប​មាស ២៤ការ៉ាត់ គឺ​ជា​មាស​ក្រហម និង​ប្លាទិន ហើយ​រំលេច​ដោយ​គ្រីស្តាល់ Swarovski ​នៅ​ផ្នែក​ខាង​ក្រោយ និង​ជាច្រើន​ទៀត។ ទូរស័ព្ទ iPhone ​SE ស្រោប​ដោយ​មាស​នេះ មាន​តម្លៃ​ចាប់ពី ១៥០០ផោន (ប្រហែល ២១២០ដុល្លារ) ​ហើយ​ម៉ូដែល​ថ្លៃ​បំផុត​អាច​រហូត​ដល់ ៥៤៤០០ផោន (ប្រហែល ៧៦៨៤០ដុល្លារ​អាមេរិក) ដែល​បង្កប់​ដោយ​ពេជ្រ​ចំនួន ៣៦៤គ្រាប់​សរុប ៥,៥ការ៉ាត់៕