ក្រុមហ៊ុន Samsung ថ្ងៃនេះ បានប្រកាសចេញស្មាតហ្វូន Android ថ្មីម្ដងពីរម៉ូដែលរួមគ្នា គឺ Galaxy J7 (ស៊េរីឆ្នាំ២០១៦) និង Galaxy J5 (២០១៦) ដែលជាជំនាន់ថ្មីបន្ទាប់ពី J7 និង J5 ចេញកាលពីឆ្នាំ២០១៥ កន្លងទៅ។ ស្មាតហ្វូនស៊េរី J ថ្មីទាំងពីរនេះ បានភ្ជាប់មកជាមួយកាមេរ៉ាមុខទំហំ 5MP អមដោយភ្លើងជំនួយ LED Flash ងាយស្រួលថត selfie នៅទីងងឹត។
ចំណែកកាមេរ៉ាក្រោយនៃ J7/J5 ថ្មីនេះ មានទំហំ 13MP អមដោយភ្លើង LED flash ផងដែរ និងមានរន្ធបំពងសម្លេង (speaker) នៅទន្ទឹមនឹងកាមេរ៉ា។ ស្មាតហ្វូន G7 ស៊េរីឆ្នាំ២០១៦ ថ្មីនេះ មានកម្លាំងម៉ាស៊ីនខ្លាំងជាងមុន។ វាមានអេក្រង់ ៥,៥អ៊ីញ Super AMOLED (1080x1920)px, បំពាក់ដោយឈីប octa-core ល្បឿន 1.6GHz។ J7 (2016) ក៏មានប្រព័ន្ធបណ្ដាញ LTE 4G ដែរ និងមាន NFC ហើយមាន RAM 3GB មេម៉ូរីម៉ាស៊ីន 16GB (អាចបន្ថែមកាត microSD) និងមានថាមពលថ្ម 3300mAh។
ងាកមកមើលលក្ខណសម្បត្តិ Galaxy J5 (2016) វិញ គឺបានបំពាក់មកជាមួយអេក្រង់ ៥,២អ៊ីញប្រភេទ Super AMOLED ដូចគ្នា (720x1280)px ប្រើឈីប Quad-Core ល្បឿន 1.2GHz មាន RAM 2GB ថាមពលថ្ម 3100mAh។ មុខងាររវាង G7 និង G5 ក៏ប្រហាក់ប្រហែលគ្នា ខុសត្រង់តែលក្ខណៈសម្បត្តិ Hardware ប៉ុណ្ណោះ។
Samsung នឹងបញ្ចេញលក់ Galaxy J7 (2016) និង J5 (2016) ទាំងពីរនៅលើទីផ្សារប្រទេសចិនក្នុងពេលឆាប់ៗខាងមុខ ប៉ុន្តែពុំទាន់មានដំណឹងពីតម្លៃរបស់វានៅឡើយ៕
