ក្រុមហ៊ុនបច្ចេកវិទ្យាខ្នាតយក្សរបស់ចិន Xiaomi ដែលពូកែខាងផលិតស្មាតហ្វូនទំនើប តែតម្លៃធូរថ្លៃដូចជាម៉ូដែលថ្មី Mi 5 ជាដើមនោះ ពេលនេះ ហាក់ដូចជាចង់បោះជំហានប្រលូកចូលទីផ្សារលក់សម្ភារៈក្នុងផ្ទះថែមទៀត ដើម្បីប្រជែងជាមួយ Samsung និង LG។ ចំណែកសម្ភារៈថ្មីចុងក្រោយនេះដែលទើបបង្ហាញនេះ គឺជាឆ្នាំងដាំបាយឆ្លាតវៃឈ្មោះ Mi Induction Heating Pressure Rice Cooker។
មិនខុសពីឆ្នាំងដាំបាយអគ្គិសនីដទៃឡើយ ដោយឆ្នាំងដាំបាយថ្មីរបស់ Xiaomi នេះមានប្រព័ន្ធស្វ័យប្រវត្តិ អាចចម្អិនបាយបានឆ្អិន និងមិនឱ្យខ្លោចឡើយ។ ប៉ុន្តែវាមានលក្ខណៈ ពិសេសជាង នៅត្រង់ឆ្នាំងដាំបាយនេះ អាចភ្ជាប់ជាមួយកម្មវិធី Mi Home ហើយអាចស្កេនរកបាវអង្ករ កំណត់ស្លាកសញ្ញា និងអង្ករសុទ្ធឬមិនសុទ្ធ។ កម្មវិធី Mi Home នេះ អាចចាប់ស្គាល់ ២០០ម៉ាកនៃប្រភេទអង្ករ ហើយក៏គ្រោងនឹងបន្ថែមម៉ាកជាច្រើនទៀតនៅពេលខាងមុខ។
https://youtu.be/zH_LqILHG9M
ក្រៅពីអាចដាំបាយបានហើយនោះ Mi Induction Heating Pressure Rice ក៏អាចប្រើសម្រាប់ការចំហុយអាហារបានផងដែរ។ ក្រុមហ៊ុន Xiaomi បានលើកឡើងថា កម្មវិធី (app) បានរួមបញ្ចូលទាំងរូបមន្តសម្រាប់ចម្អិនបាយ និងសូម្បីតែនំ cake។ អ្នកប្រើងាយស្រួលរកមើលរូបមន្ត ហើយកំណត់ប្រើនូវវិធីសាស្ត្រតាមកម្មវិធីបាន។
ឆ្នាំដាំបាយឆ្លាតវៃនេះ នឹងមានលក់លើទីផ្សារប្រទេសចិន តាមវែបសាយ Mi.com ចាប់ពីថ្ងៃទី៦ មេសាខាងមុខ។ តម្លៃរបស់វា ថ្លៃជាង ៤០% បើប្រៀបធៀបនឹងតម្លៃឆ្នាំងដាំបាយអគ្គិសនីផលិតផលជប៉ុនមួយចំនួន ពោលគឺ ១៥៣ដុល្លារអាមេរិក៕
