ប្រុងប្រយ័ត្ន​មេរោគ​ទូរស័ព្ទ Android ថ្មី​នេះ តែ​បាន​ឆ្លង​ចូល​ហើយ ត្រៀម​តែ​លុយ​ទិញ​ទូរស័ព្ទ​ថ្មី​ឱ្យ​ហើយ​ទៅ!​



យើង​ធ្លាប់​តែ​ឃើញ​មេរោគ malware នៅ​លើ​ប្រព័ន្ធ​ប្រតិបត្តិការ Android មាន​លទ្ធភាព​អាច​លួច​យក​រូបថត និង​វីដេអូ​ដើម្បី​ជា​ថ្នូរ​ជា​ប្រយោជន៍​ចំពោះ​ម្ចាស់​ទូរស័ព្ទ ហើយ​មេរោគ​ខ្លះ​ទៀត​អាច​បញ្ឈប់​ដំណើរការ (shutdown process) របស់​ទូរស័ព្ទ និង​លួច​យក​ទិន្នន័យ​សម្ងាត់​ពី​ទូរស័ព្ទ ដោយ​ធ្វើឲ្យ​អេក្រង់​ទូរស័ព្ទ​រលត់​ដូច​ពេល​ដាក់ sleep អីចឹង។ ប៉ុន្តែ​មេរោគ malware ថ្មី​នេះ កាន់តែ​សាហាវ​ជាង​មេរោគ​ខាង​លើ​ទៅទៀត ព្រោះពិបាក​លុប រហូត​ដល់​ក្រុមហ៊ុន​ផ្ដល់​សុវត្ថិភាព​ចំពោះ​ឧបករណ៍​ចល័ត Lookout បាន​ព្រមាន​ថា បើ​ឆ្លង​ហើយ យល់​ល្អ​ទិញ​ទូរស័ព្ទ​ថ្មី​តែម្ដង។

Android

ក្រុម​អ្នក​ស្រាវជ្រាវ​របស់ Lookout បាន​រក​ឃើញ​តំណាង (sample) ប្រមាណ ២ម៉ឺន​នៃ​បណ្ដុំ​មេរោគ malware ចំនួន៣ ដែល​មាន​ឈ្មោះ Shedun, Shuanet និង ShiftyBug ដែល​ចែកចាយ​កូដ​ដដែលៗ​ជាច្រើន និង​ស្នៀត​ស្រដៀង​គ្នា ដើម្បី​បើក​ការ​វាយប្រហារ​ចំពោះ​ទូរស័ព្ទ​អ្នក​ប្រើ។ នៅ​ពេល​ណា​មេរោគ​ឆ្លង​ចូល ដែល​ភាគច្រើន​ឆ្លង​តាម​ប្រភេទ​កម្មវិធី third-party app នោះ​កម្មវិធី​ទាំងនោះ នឹង​រូត (root) ធ្វើឲ្យ​ទូរស័ព្ទ​ជួប​បញ្ហា​ក្នុង​រូបភាព​ផ្សេងៗ​គ្នា។ មេរោគ​នេះ នឹង​ចម្លង​ខ្លួន​វា​ទៅ​កាន់​សេវា​ថ្នាក់​ប្រព័ន្ធ (system-level service) តែ​អាច​បំភាន់​មិន​ឱ្យ​មើល​ដឹង​ជា​មេរោគ ដោយ​ក្លែង​ជា​កម្មវិធី​ទូរស័ព្ទ​កំពុង​ពេញ​និយម​មួយ​ចំនួន ក្នុង​នោះ​ក៏​មាន Facebook, Candy Crush, Twitter, Snapchat, WhatsApp និង​កម្មវិធី​ផ្សេងៗ​ទៀត។ បញ្ហា​ធ្ងន់ គឺ​ទៅ​លើ​ឧបករណ៍​ដែល​បាន root ដោយ​មេរោគ​នេះ អាច​ត្រូវ​បាន​ប្រើ​សម្រាប់​ពង្រាយ​បន្ត​មេរោគ​ជាច្រើន​ទៀត ជា​ពពួក adware និង malware នៅ​លើ​ឧបករណ៍។ កាន់តែ​គ្រោះថ្នាក់​នោះ មេរោគ​នេះ​ថែមទាំង​មាន​សមត្ថភាព​អាច​លួច​យក​ទាំង​ព័ត៌មាន​ឯកជន និង​ព័ត៌មាន​ផ្នែក​សុវត្ថិភាព​អនឡាញ ដែល​ឈាន​ទៅ​ដល់​ការ​លួច​ព័ត៌មាន​ពាក់ព័ន្ធ​ហិរញ្ញវត្ថុ​ថែមទៀត។ ក្រុមហ៊ុន​ផ្ដល់​សុវត្ថិភាព​លើ​ឧបករណ៍​ចល័ត​របស់​អាមេរិក LookOut នេះ បាន​និយាយ​ថា មេរោគ malware ប្រភេទ​នេះ ពិត​ជា​មាន​ការ​ពិបាក​ក្នុង​ការ​លុប​ចេញ​ពី​ទូរស័ព្ទ​ខ្លាំង​ណាស់។ «ប្រសិន​ឆ្លង​មេរោគ Shedun, Shuanet និង ShiftyBug ចូល​ទូរស័ព្ទ យល់​ល្អ​គួរ​តែ​ទិញ​ទូរស័ព្ទ​ថ្មី​ប្រើ​វិញ​ទៅ»។ នេះ​ជា​ការ​លើកឡើង​របស់​ប្រធាន​ស្រាវជ្រាវ​សុវត្ថិភាព​របស់ LookOut លោក Michael Bentley។ លោក​បន្ត​ថា ការ​ធ្វើ factory reset លើ​ឧបករណ៍​ដែល​រង​ការ​វាយប្រហារ​ដោយ​មេរោគ​នេះ គឺ​នៅ​តែ​មិន​អាច​លុប malware ដ៏​សាហាវ​នេះ​បាន​នោះ​ទេ។ ក្រុមហ៊ុន LookOut ឱ្យ​ដឹង​ថា ម្ចាស់​ទូរស័ព្ទ​ដែល​រងគ្រោះ​ដោយសារ​មេរោគ malware នេះ ភាគច្រើន​ជា​អ្នក​នៅ​អាមេរិក និង​អាល្លឺម៉ង់ ដោយសារ​គេ​លេង​កម្មវិធី​ប្រភេទ third-party app ច្រើន។ ដូច្នេះ​ប្រសិន​លោក​អ្នក​មាន​ទូរស័ព្ទ Android ប្រើ​គួរ​ជៀសវាង​ចូល​ទៅ third-party app store ផ្ដេសផ្ដាស ពោល​គឺ​ធ្វើការ​ដំឡើង​កម្មវិធី​តែ​ពី​ក្នុង Google Play បាន​ហើយ៕ ​ប្រែ​សម្រួល៖ រឹទ្ធិរាជ ប្រភព៖ mashable