ក្រុមហ៊ុន Apple ​ត្រូវ​គេ​រំពឹង​ថា នឹង​ប្រកាស​ចេញ​ iPhone 7 ​និង 7 Plus ជំនាន់​ថ្មី​នៅ​អំឡុង​ខែ​កញ្ញា ​ហើយ​យើង​ក៏​ធ្លាប់​បាន​លេចឮ​ព័ត៌មាន​អំពី​លក្ខណសម្បត្តិ និង​ការ​រចនា​ខ្លះ​កន្លង​មក។ ចំណែក​បើ​យោង​តាម​របាយការណ៍​ថ្មី​ចុងក្រោយ​នេះ ឱ្យ​ដឹង​មក​ថា​ទូរស័ព្ទ iPhone 7 និង 7 Plus របស់ Apple ​នឹង​មាន​កម្រាស់​ស្ដើង​ជាង​មុន ហើយ​ស្រាល​ជាង iPhone 6S និង 6S Plus ទៅ​ទៀត។ iPhone ជំនាន់​ទី១០ ទាំងពីរ​នឹង​មាន​ថាមពល​ថ្ម​ខ្ពស់​ជាង iPhone ជំនាន់​បច្ចុប្បន្ន ហើយ​នឹង​មាន​ការ​វេច​ខ្ចប់​តាម​ស្តង់ដារ​បច្ចេកវិទ្យា​ខ្ពស់ ​បំពាក់​ឈីប RF ​នៅ​លើ iPhone 7 ​ដែល​នឹង​ធ្វើឲ្យ​កម្រាស់​របស់​វា ស្ដើង​ជាង​មុន និង​ស្រាល​ជាង​មុន។ iPhone 7 ថ្មី​ទាំង​ពីរ នឹង​ត្រូវ​ក្រុមហ៊ុន​ដក​ចោល​រន្ធ​កាស ៣,៥មិល្លីម៉ែត្រ ​ជំនួស​មក​វិញ​នូវ​រន្ធ lightning ហើយ​អាច​ប្រើ​ទាំង​ដោត​កាស និង​សាក​ថ្ម។ iPhone 7/7 Plus ​ត្រូវ​គេ​រំពឹង​ថា នឹង​បំពាក់​ឈីប Apple A10 ​ហើយ​នឹង​មាន RAM ទំហំ 3GB ឬ​អាច​ដល់ 4GB ​គឺ​ធំ​ជាង iPhone 6s/6s Plus ដែល​មាន​ត្រឹម 2GB។ ​គេ​រំពឹង​ថា Apple នឹង​ប្រកាស​ចេញ iPhone 7 និង 7 Plus នៅ​ខែ​កញ្ញា​ខាង​មុខ៕