ព័ត៌មាន​បាន​ចេញ​ផ្សាយ​កាលពី​សប្ដាហ៍​មុន ឱ្យ​ដឹង​ថា ក្រុមហ៊ុន Amazon និង Microsoft ​ទាំងពីរ​កំពុង​ពិចារណា​ទទួល​យក​ការ​អភិវឌ្ឍ​បច្ចេកវិទ្យា​រថយន្ត​បើកបរ​ស្វ័យប្រវត្តិ​រួម​គ្នា គឺ​ពុំ​មែន​ជា​ព័ត៌មាន​បោក​ក្នុង​ថ្ងៃ April Fools ឡើយ។ មក​ដល់​សប្ដាហ៍​នេះ ក្រុមហ៊ុន​ផលិត​គ្រឿង​យន្ត​ដំណើរការ​ស្វ័យប្រវត្តិ​របស់​អាល្លឺម៉ង់ Daimler ​និង​ជា​ម្ចាស់​ក្ដោបក្ដាប់​ក្រុមហ៊ុន Mercedes-Benz ​ផង​នោះ បាន​អះអាង​ប្រាប់​ព្រឹត្តិបត្រ​ព័ត៌មាន Wall Street ​ថា ក្រុមហ៊ុន​បច្ចេកវិទ្យា​យក្ស​ទាំងពីរ​បាន ព្រមព្រៀង​សហការ​គ្នា​យ៉ាង​ជិតស្និទ្ធ​ដើម្បី​អភិវឌ្ឍ​បច្ចេកវិទ្យា​ផែនទី​សម្រាប់​បំពាក់​លើ​រថយន្ត​ស្វ័យប្រវត្តិ​ពិត​មែន។ សេវាកម្ម​ផែនទី Here ត្រូវ​បាន​ទិញ​យក​ដោយ​ក្រុមហ៊ុន​រថយន្ត​អាល្លឺម៉ង់​មួយ​ចំនួន​ក្នុង​នោះ​មាន​ក្រុមហ៊ុន BMW, Audi និង Mercedes ក្នុង​ទំហំ​ទឹកប្រាក់ ២,៨ពាន់​លាន​អឺរ៉ូ ឬ​ប្រហែល​ក្រោម ៣ពាន់​លាន​ដុល្លារ​អាមេរិក​បន្តិច។ សមាជិក​ក្រុម​ក្រុមប្រឹក្សាភិបាល​ម្នាក់​នៅ​ក្រុមហ៊ុន Daimler បាន​អះអាង​ថា ក្រុមហ៊ុន​ទាំង​ពីរ​គឺ Amazon និង Microsoft បាន​ចាប់អារម្មណ៍​លើ​ការ​ផ្ដល់​ជូន​សេវាកម្ម Cloud Computing សម្រាប់​រក្សាទុក​ទិន្នន័យ​បាន​ពី​ការ​ប្រមូល​ដោយ​សេនសឺរ​របស់​សេវាកម្ម Here ទុក​បំពាក់​លើ​រថយន្ត​បើកបរ​ស្វ័យប្រវត្តិ។ លោក Thomas Weber ​សមាជិក​ម្នាក់​ក្នុង​ក្រុមប្រឹក្សាភិបាល​របស់ Daimler ​បាន​លើកឡើង​ដូច្នេះ​ថា៖ «​យើង​កំពុង​ពិភាក្សា​ជាមួយ​ Amazon, Microsoft និង​បណ្ដា​ក្រុមហ៊ុន​រថយន្ត​ជាច្រើន​ទៀត»។ «​យើង​ចង់​ឱ្យ​ក្រុមហ៊ុន​ផ្ដល់​សេវាកម្ម Cloud ​សហការ​នឹង​យើង​ដើម្បី​នាំ​យក​បច្ចេកវិទ្យា​ផែនទី​មក​បំពាក់​លើ​រថយន្ត​ស្វ័យប្រវត្តិ»។ សូម​បញ្ជាក់​ថា បច្ចុប្បន្ន​ក្រុមហ៊ុន Google ​ធ្វើ​បាន​យ៉ាង​ល្អ​ជាមួយ​គម្រោង​រថយន្ត Self-driving របស់​ខ្លួន ដោយ​កំពុង​ដាក់​ឱ្យ​ធ្វើតេស្ត​រថយន្ត​បើកបរ​ស្វ័យប្រវត្តិ​របស់​ខ្លួន​អស់​ចម្ងាយ​រាប់​លាន​ម៉ាយល៍​មក​ហើយ។ ចំណែក GM និង Lyft ក៏​កំពុង​ធ្វើការ​ជាមួយ​គ្នា​លើ​ការ​បង្កើត​ស៊េរី​រថយន្ត​ស្វ័យប្រវត្តិ​ផង​ដែរ ស្រប​ទៅ​តាម​តម្រូវការ​ទីផ្សារ​រថយន្ត។ ហើយ​ក៏​នៅ​មាន​វត្តមាន​ក្រុមហ៊ុន​មួយ​ចំនួន​ទៀត​កំពុង​ស្រាវជ្រាវ​ប្រភេទ​រថយន្ត​អូតូ​នេះ​ដូច​ជា Tesla និង​ក្រុមហ៊ុន​រថយន្ត Ford ជាដើម៕