តាមសេចក្ដីរាយការណ៍ដំបូងគេពីគេហទំព័រកូរ៉េ SamMobile ថ្មីៗនេះឱ្យដឹងថា ក្រុមហ៊ុន Samsung ទើបបានចុះបញ្ជីប៉ាតង់នូវបច្ចេកវិទ្យាកែវពាក់ភ្នែក Contact Lens ពិសេស សម្រាប់បំពាក់ជាមួយកាមេរ៉ា, សេនសឺរចលនា (motion sensor), ឧបករណ៍បញ្ជូន (transmitter) និងឧបករណ៍បង្ហាញ (display unit)។
បច្ចេកវិទ្យា Contact Lens ថ្មីរបស់ Samsung អាចត្រូវបានប្រើក្នុងទម្រង់តំណភ្ជាប់ឥតខ្សែ ដើម្បីធ្វើទំនាក់ទំនងទៅកាន់ស្មាតហ្វូនរបស់អ្នកពាក់កែវពិសេសនេះ ហើយចលនានៃកែភ្នែករបស់អ្នកប្រើ និងការធ្មេចភ្នែកជាដើម នឹងត្រូវផ្ញើក្នុងទម្រង់ពាក្យបញ្ជា (command) ទៅកាន់ឧបករណ៍ដែលបានភ្ជាប់។ ប៉ាតង់បច្ចេកវិទ្យានេះ អាចធ្វើឱ្យគេនឹងឃើញដល់ការច្របាច់បញ្ចូលគ្នាទៅក្នុងវែនតាឆ្លាវៃ Google Glass ព្រោះដើម្បីផ្ដល់ការបង្ហាញរូបកាន់តែល្អឥតខ្ចោះ ក្នុងទំហំមុំធំ និងគុណភាពរូបខ្ពស់។
សូមបញ្ជាក់ថា កន្លងទៅក្រុមហ៊ុន Google ក៏បានប្រកាសគម្រោងអភិវឌ្ឍ Contact Lens ឆ្លាតវៃរបស់ខ្លួនដែរ ដែលវាមានមុខងារពិសេសអាចត្រួតពិនិត្យជាតិស្ករក្នុងឈាម ដើម្បីបង្ការគ្រោះថ្នាក់នៅពេលអ្នកមិនបានគ្រប់គ្រងបរិមាណជាតិស្ករត្រឹមត្រូវ៕
