Galaxy Note ត្រូវ​ក្រុមហ៊ុន Samsung ប្រកាស​ចេញ​អំឡុង​ខែ​សីហា ឆ្នាំ​២០១៥ ​ដែល​វា​ជា​ប្រភេទ​ឧបករណ៍​ស្មាតហ្វូន​កាន់​ថេប្លេត ឬ​ហៅ​ថា ផេប្លេត Android កំពូល​មួយ។ ​ចំណែក​ពេល​នេះ​គេ​ទទួល​បាន​របាយការណ៍​មក​ថា Galaxy Note ជំនាន់​ថ្មី​មួយ​ទៀត​គឺ Note 6 នឹង​បង្ហាញ​ខ្លួន​អម​ដោយ​លក្ខណសម្បត្តិ​កាន់តែ​ល្អ​ជាង​មុន អាច​ត្រូវ​វែក​មុខ​នៅ​ខែ​កក្កដា ឆ្នាំ២០១៦ ខាងមុខ​នេះ។ យោងតាម​របាយការណ៍​ពី​គេហទំព័រ​កូរ៉េ​ឱ្យ​ដឹង​ថា Samsung មាន​គម្រោង​ប្រកាស​ចេញ Galaxy Note 6 ​នៅ​អំឡុង​ពាក់​កណ្ដាល​ខែ​កក្កដា (ប្រហែល​មិន​ដល់ ៤ខែ​ទៀត​ឡើយ)។ ប្រភព​ដដែល​អះអាង​ថា Note ថ្មី​នឹង​មាន​កូដ Grace ​ដំណើរការ​ដោយ Android N ​ពី​ប្រអប់​តែ​ម្ដង ដែល​មាន​ន័យ​ថា Google គួរ​តែ​បញ្ចេញ​ជំនាន់​ចុងក្រោយ​ផ្លូវការ​នៃ OS ថ្មី​នេះ​ឱ្យ​បាន​មុន​គឺ​យ៉ាង​យូរ​នៅ​ដើម​ខែ​កក្កដា ខណៈ បច្ចុប្បន្ន Android N ​ស្ថិត​ក្នុង​ដំណាក់កាល​ធ្វើតេស្ត​ប្រើ​សាកល្បង​ប៉ុណ្ណោះ។ ​ទោះជា​យ៉ាងណា វែបសាយ​កូរ៉េ​ខាង​លើ​មិន​បាន​ទម្លាយ​ចេញ​ព័ត៌មាន​ច្រើន​ជាង​នេះ​ឡើយ។ តាម​របាយការណ៍​កន្លង​មក​លើកឡើង​ថា Galaxy Note 6 អាច​មាន​អេក្រង់ ៥,៨អ៊ីញ​ធំ​ជាង Note 5 ដែល​ទំហំ ៥,៧អ៊ីញ​តែ​បន្តិច និង​ភ្ជាប់​ជាមួយ​ប៊ិច S Pen ដូច​សព្វ​ដង ហើយ​មាន RAM រហូត​ដល់ 6GB, កាមេរ៉ា​ក្រោយ 12MP ​ដូច Galaxy S7 និង S7 edge។ មេម៉ូរី​ផេប្លេត​ថ្មី Note នេះ​នឹង​មាន​ពីរ​ជម្រើស​គឺ​ទំហំ 128GB និង 256GB។ រង់ចាំ​មើល​ថា តើ Note 6 នឹង​កាន់តែ​ទំនើប​ជាង Note 5 យ៉ាងណា​ខ្លះ? ហើយ​តើ​មាន​ម៉ូដែល​អេក្រង់​កោង​ដែរ​ឬ​ទេ?