ស្មាតហ្វូន​ថ្មី​ចុងក្រោយ​របស់ Samsung គឺ Galaxy S7 និង S7 edge ត្រូវ​បាន​បំពាក់​បច្ចេកវិទ្យា​មិន​ចូល​ទឹក ដែល​ផ្ដល់​ទំនុក​ចិត្ត​យ៉ាង​ខ្លាំង​ដល់​អតិថិជន មិន​ខ្លាច​ចូល​ទឹក ទោះបី​ស្ថិត​ក្នុង​កាលៈទេសៈ​ក្រោម​តំណក់​ទឹក​ភ្លៀង ឬ​យក​ទៅ​ថត​ក្នុង​ទឹក​ក៏​បាន។ ​ចំណែក​របាយការណ៍​ថ្មី​នេះ ឱ្យ​ដឹង​ថា ផេប្លេត Galaxy Note 6 ​ក៏​នឹង​បំពាក់​បច្ចេកវិទ្យា​មិន​ចូល​ទឹក​ដែរ។ យោង​តាម​របាយការណ៍​ថ្មី​នេះ​ថា Galaxy Note 6 នឹង​ភ្ជាប់​មក​ជាមួយ​បច្ចេកវិទ្យា​មិន​ចូល​ទឹក IP68 ​ដូច​មាន​ប្រើ​នៅ​លើ Galaxy S7 និង S7 edge។ IP68 ​សម្រាប់ Note 6 នឹង​អាច​ធ្វើឲ្យ​ផេប្លេត​ស៊ូទ្រាំ​នឹង​ជម្រៅ​ទឹក ១,៥ម៉ែត្រ ក្នុង​រយៈពេល ៣០នាទី​បាន​ដោយ​គ្មាន​បញ្ហា។ ថ្មីៗ​នេះ យើង​បាន​ឃើញ​សមត្ថភាព Galaxy S7 ដែល​អាច​ធន់​នឹង​ជម្រៅ​ទឹក​បាន​យូរ​ជាង​រយៈពេល​បាន​កំណត់​ខាង​ដើម​ទៅ​ទៀត ហើយ Note 6 នេះ​ក៏​នឹង​មាន​សមត្ថភាព​ដូច​គ្នា​ដែរ។ ស ចចាមអារ៉ាម​មុន​បាន​លើកឡើង​ថា Note 6 ​អាច​នឹង​មាន​អេក្រង់ ៥,៧អ៊ីញ​គាំទ្រ​ការ​បង្ហាញ​រូប 4K, ហើយ​​មាន RAM រហូត​ដល់ 6GB។ វា​នឹង​បំពាក់​ដោយ​ឈីប Exynos 8990 ឬ Qualcomm Snapdragon 820 ​និង​មាន​មេម៉ូរី​ម៉ាស៊ីន 256GB ​បច្ចេកវិទ្យា UFS storage ថ្មី​របស់ Samsung។ កាមេរ៉ា Note 6 ​នឹង​មាន​ទំហំ​ដូច​នៅ​លើ S7/S7 edge ដែរ គឺ​ខាង​មុខ​ទំហំ 5MP ហើយ​ខាង​ក្រោយ​ទំហំ 12MP ​ថត​វីដេអូ​​ក្នុង​កម្រិត Ultra HD ​4K។ ក្រុមហ៊ុន Samsung ត្រូវ​គេ​រំពឹង​ថា វែក​មុខ Galaxy Note 6 ​នៅ​អំឡុង​ខែ​កក្កដា ឆ្នាំ២០១៦ នេះ​ហើយ ដែល​នឹង​ដំណើរការ​ដោយ Android N ​ពី​ប្រអប់​ស្រាប់៕