​កំពូល​ទូរស័ព្ទ iPhone 7s ​ដែល​ចេញ​នៅ​ឆ្នាំ​២០១៧ នឹង​ត្រូវ​ផលិត​ស្រោប​ដោយ​កញ្ចក់​ទាំង​ស្រុង​



តាម​សេចក្ដី​រាយការណ៍​ពី​គេហទំព័រ 9to5Mac ​ឱ្យ​ដឹង​ក្ដៅៗ​មក​ថា ទូរស័ព្ទ​ស្មាតហ្វូន​ទំនើប​របស់ Apple ដែល​នឹង​ចេញ​ក្នុង​ឆ្នាំ២០១៧ ខាង​មុខ​គឺ iPhone 7s នឹង​ត្រូវ​បាន​ស្រោប​ដោយ​កញ្ចក់​ទាំងស្រុង ធ្វើឲ្យ​វា​រឹតតែ​ទំនើប​ទាន់សម័យ​ជាង​មុន។ សូម​បញ្ជាក់​ថា គំនិត​រចនា iPhone ​ស្រោប​កញ្ចក់​នេះ ត្រូវ​បាន​យក​ទៅ​ប្រើ​នៅ​លើ​ចាប់តាំង​ពី​ជំនាន់ iPhone 4 ​មក​ហើយ ដែល​ផ្នែក​ខាង​មុខ និង​ខាង​ក្រោយ​របស់​វា ស្រោប​ដោយ​កញ្ចក់ ផ្ដល់​ភាព​ថ្មី​យូរ​អង្វែង។ ចំណែក​ចចាមអារ៉ាម​ចុងក្រោយ​នេះ បាន​លើកឡើង​ថា Apple ​អាច​នឹង​រចនា​ស្ទីល​ប្រើ​កញ្ចក់​ទាំង​ស្រុង​នៅ​លើ​តួ​ខ្លួន​របស់ iPhone 7s ដែល​ចេញ​នៅ​ឆ្នាំ​ក្រោយ។ ទោះជា​យ៉ាងណា ការ​ផលិត​ទូរស័ព្ទ​ស្រោប​ដោយ​កញ្ចក់​បែប​នេះ វា​មាន​ហានិភ័យ​ខ្ពស់​លើ​ការ​ជ្រុះ ព្រោះ​ងាយ​នឹង​ប្រេះស្រាំ ឬ​បែក​សាច់​កញ្ចក់​ដែល​ស្រោប​ពី​ក្រៅ​នោះ។ អ្នក​វិភាគ​ជំនាញ​លោក Ming-Chi Kuo ​នៅ​ក្រុមហ៊ុន KGI ​ដែល​ទស្សន៍ទាយ​ឆុត​ទៅ​លើ​សមិទ្ធផល​ថ្មីៗ​ជាច្រើន​របស់ Apple ​បាន​រំពឹង​ថា iPhone ដែល​មាន​ការ​រចនា​ថ្មី​សន្លាង​ខុស​ប្លែក​មុខ នឹង​មិន​ទាន់​បង្ហាញ​ខ្លួន​ក្នុង​ឆ្នាំ២០១៦ នេះ​នៅ​ឡើយ​ទេ តែ​គឺ​នឹង​ចេញ​នៅ​ឆ្នាំ​ក្រោយ​នៅ​លើ iPhone 7s។ លោក Kuo មាន​ប្រសាសន៍​ថា គឺ​នៅ​ពេល​ដែល Apple ផ្លាស់ប្ដូរ​ការ​ឌីហ្សាញ​ដូច​នៅ​លើ iPhone 4 ​ដែល​មាន​កញ្ចក់​គ្រប​លើ​ផ្នែក​ទាំង​អស់ ហើយ​នឹង​បំពាក់​ដោយ​អេក្រង់ AMOLED៕