នាយកដ្ឋាន Homeland Security របស់អាមេរិក និងក្រុមហ៊ុនអ៊ីនធឺណិតលំដាប់កំពូលរបស់ បានប្រកាសជាសាធារណៈឱ្យអ្នកប្រើកុំព្យូទ័រ Windows PC ទាំងឡាយធ្វើការលុប (uninstall) ចោលនូវកម្មវិធីចាក់ចម្រៀង Quicktime របស់ Apple បន្ទាប់ពីរកឃើញកំហុសឆ្គងលើភាសាកូដ (bug) ចំនួន២ ភ្លាមៗនៅក្នុងសូហ្វ៊ែរនេះ។
តាមការបង្ហោះនៅក្នុង blog កាលពីថ្ងៃព្រហស្បតិ៍កន្លងទៅ ក្រុមហ៊ុនផ្ដល់សេវាកម្មសុវត្ថិភាពប្រព័ន្ធសូហ្វ៊ែរ Trend Micro បាននិយាយថា ក្រុមហ៊ុន Apple មិនអាចធ្វើការផ្ដល់កញ្ចប់បច្ចុប្បន្នភាពសម្រាប់កម្មវិធី Quicktime នៅលើ Windows បានឡើយ ដោយសារប្រឈមនឹងកំហុសកូដ (bug) ទាំងពីរនេះ។ ក្រុមហ៊ុន Trend Micro បន្តថា bugs អាចត្រូវបានប្រើប្រាស់សម្រាប់វាយប្រហារប្រព័ន្ធសូហ្វ៊េរនៅលើកុំព្យូទ័រ Windows PC ដើម្បីប្រមូលយកទិន្នន័យពីទំព័រវែបសាយ (web page) ឬបើកមើលឯកសារសម្ងាត់ជាក់លាក់មួយ។
គេមិនដឹងថា ករណីនេះគឺជាអំពើរបស់ Hacker ចង់កេងប្រវ័ញ្ចយកប្រយោជន៍របស់អ្នកប្រើ ឬមួយយ៉ាងណានោះទេ។ ទោះជាយ៉ាងណានាយកដ្ឋានប្រឆាំងអំពើភេរវកម្ម Homeland Security បានធ្វើការព្រមានឱ្យដែលកំពុងប្រើកម្មវិធី Quicktime នៅលើ Windows PC ទាំងឡាយ លុបកម្មវិធីនេះចេញដើម្បីសុវត្ថិភាពប្រព័ន្ធ និងសុវត្ថិភាពឯកសារសំខាន់ៗរបស់ខ្លួនជៀសវាង hacker លួចយក។ ការព្រមានធ្វើឡើងតែសម្រាប់កុំព្យូទ័រ Windows PC មិនបាននិយាយអំពី Quicktime ដំណើរការលើប្រព័ន្ធ Mac ឡើយ។
ចំណែកអង្គការត្រៀមសង្គ្រោះប្រព័ន្ធសុវត្ថិភាពដែលត្រូវវាយប្រហារ US-CERT ក៏បានដាក់ការព្រមាននេះឡើងកាលពីថ្ងៃព្រហស្បតិ៍កន្លងទៅដែរ ឱ្យអ្នកប្រើ Windows PC ទាំងឡាយប្រុងប្រយ័ត្នចំពោះមេរោគ និងការគំរាមកំហែងផ្សេងៗដោយសារបញ្ហាសុវត្ថិភាពលើ QuickTime ដូចគ្នា៕
