បន្ទាប់ពីបានប្រកាសចេញកុំព្យូទ័រ New MacBook អេក្រង់ ១២អ៊ីញដំបូងកាលពីដើមឆ្នាំ២០១៥ ពេលនេះក្រុមហ៊ុន Apple បានចេញលក់ Retina MacBook អេក្រង់ ១២អ៊ីញថ្មីទៀតហើយ។ New MacBook បំពាក់បច្ចេកវិទ្យាអេក្រង់ Retina ទំហំ ១២អ៊ីញថ្មីនេះ ត្រូវក្រុមហ៊ុនធ្វើបច្ចុប្បន្នភាពលើលក្ខណសម្បត្តិ ក្នុងនោះមានដូចជា បំពាក់អង្គប្រតិបត្តិថ្មី និងមានជម្រើសពណ៌មាសក្រហម (Rose Gold)។ https://youtu.be/iMwCBuMUUPU កុំព្យូទ័រ Retina MacBook ១២អ៊ីញថ្មីនេះ បានបំពាក់ដោយអង្គប្រតិបត្តិជំនាន់ចុងក្រោយរបស់ក្រុមហ៊ុន Intel, កែលំអលើក្រាហ្វិក អង្គផ្ទុកទិន្នន័យល្បឿនលឿនជាងមុន ហើយក៏បានកែលំអលើសមត្ថភាពថ្មដោយកាន់បានរយៈពេលយូរជាងមុនប្រហែល ១ម៉ោងផងដែរ។

MacBook ១២អ៊ីញស៊េរីឆ្នាំ២០១៦ នេះ ត្រូវគេអះអាងថា បំពាក់ CPU ល្បឿនលឿនជាងមុនពី ១៥% ទៅ ១៨% ប្រភេទ Core m7 ល្បឿន 1.3GHz ជាមួយល្បឿន Turbo Boost ដល់ 3.1GHz។ ចំណែកមេម៉ូរីរបស់វាមានល្បឿន 1866 Mhz លឿនជាងមុនផងដែរ។ វាប្រើប្រាស់ក្រាហ្វិកថ្មី Intel HD Graphic 515 ដែលមានល្បឿនលឿនជាងមុន ២៥% ហើយបំពាក់កាមេរ៉ា FaceTime កម្រិត 480p, ថ្មមានថាមពល ៤១,៤វ៉ាត់ម៉ោង។

សម្រាប់ការប្រើប្រាស់ដោយភ្ជាប់អ៊ីនធឺណិត បើកវែបសាយផ្សេងៗអាចប្រើបានរយៈពេលប្រហែល ១០ម៉ោង ប្រសិនប្រើសម្រាប់ការស្ដាប់ចម្រៀងតាម iTunes វិញគឺប្រើបាន ១១ម៉ោង និងអាចបើកចោល (standby time) រហូតដល់ ៣០ថ្ងៃឯណោះ។

ចំពោះតម្លៃរបស់វា គឺចាប់ពី ៩២៩ដុល្លារ ទៅ ១៣១៩ដុល្លារសម្រាប់ទីផ្សារអាមេរិក និងអាស្រ័យលើលក្ខណៈសម្បត្តិរបស់វា។ ចំពោះម៉ូដែលតម្លៃ ៩២៩ដុល្លារ មានភ្ជាប់ដោយអង្គប្រតិបត្តិ Intel dual-core Core M ល្បឿន 1.1GHz, RAM 8GB នៅ 1600MHz LPDDR3, អង្គផ្ទុកទិន្នន័យទំហំ 256GB PCIe-based flash storage និងក្រាហ្វិក Intel HD Graphic 5300៕