ខណៈដែលឧបករណ៍ Gear VR សម្រាប់ពាក់ដូចទៅនឹងវ៉ែនតា បង្ហាញរូបដូចពិតៗ ត្រូវបានគេប្រសិទ្ធិនាមឱ្យ ជាឧបករណ៍ Virtual Device ល្អបំផុតដែលសាធារណជនអាចទិញប្រើបានឥលូវនេះនោះ ក៏មានបញ្ហាមួយកើតមាននៅត្រង់ ប្រើ Gear VR សម្រាប់លេងហ្គេម និងមើលវីដេអូ។ វ៉ែនតា Gear VR នេះហាក់នៅមានដែនកំណត់ក្នុងការប្រើប្រាស់នៅឡើយ។ ប៉ុន្តែពេលនេះ Samsung ទើបប្រកាសថា ឧបករណ៍សម្រាប់ពាក់នឹងក្បាល (headset) របស់ខ្លួន នឹងអាចប្រើសម្រាប់ការឆែកមើលវែបសាយបាន ដែលត្រូវក្រុមហ៊ុនហៅថា “Samsung Internet for Gear VR”។
អនុប្រធានរបស់ Samsung លោក Chan-Woo Park បាននិយាយថា៖ «ជាអ្នកត្រួសត្រាយនៅក្នុងឧស្សាហកម្ម VR ចល័ត ក្រុមហ៊ុន Samsung បានបន្តធ្វើការឥតឈប់ឈរដើម្បីផ្ដល់នូវការប្រើប្រាស់ជាមួយបទពិសោធន៍ពេញចិត្តគ្រប់យ៉ាងដល់អ្នកប្រើ ដើម្បីនាំអ្នកប្រើចូលទៅដែននិមិត្តដូចពិតជាក់ស្ដែង។ តួយ៉ាងដូចជាការចង់បានរបស់អតិថិជននូវមាតិកាវីដេអូកម្រិត ៣៦០ដឺក្រេ ដោយក្រុមហ៊ុនទើបដាក់ចេញ Samsung Internet for Gear VR សម្រាប់បន្ថែមបទពិសោធន៍ថ្មីដល់អ្នកប្រើ ជាប្រភេទមាតិកាភ្ជាប់ប្រព័ន្ធ ecosystem សម្រាប់អតិថិជន ការកំណត់នូវស្តង់ដារឧស្សាហកម្មមួយ ចំពោះបទពិសោធន៍នៃការទស្សនា VR»។
Samsung ឱ្យដឹងថា កម្មវិធី browser នឹងអនុញ្ញាតឱ្យអ្នកប្រើ Gear VR បើកមើលវែបសាយបាន ជាមួយការបង្ហាញមាតិកា ៣៦០ដឺក្រេ និងវីដេអូ streaming ប្រភេទ 3D ភ្ជាប់ជាមួយការគាំទ្រវីដេអូ HTML5 ផងដែរ។ នេះគឺមានន័យថា អ្នកនឹងអាចទស្សនាវីដេអូទម្រង់រាប់ស្មើ (flat) ជាជម្រើសសម្រាប់ VR នៅលើ YouTube។
ប្រែសម្រួល៖ រឹទ្ធិរាជ
ប្រភព៖ techspot
