Mozilla សម្លាប់ស្មាតហ្វូនដើរដោយប្រព័ន្ធប្រតិបត្តិការ Firefox OS ដោយសារមិនត្រូវប៉ាន់
សហគមន៍ផ្ដល់សូហ្វ៊ែរកម្មវិធីហ្វ្រី Mozilla ថ្មីៗនេះបានប្រកាសថា ខ្លួននឹងបញ្ចប់ការអភិវឌ្ឍស្មាតហ្វូនដំណើរការដោយប្រព័ន្ធប្រតិបត្តិការ Firefox ហើយ។ ក្រុមហ៊ុនថែមទាំងបានបញ្ជាក់ថា ខ្លួននឹងបញ្ឈប់ការលក់ឧបករណ៍ដែលដើរដោយ Firefox OS។
Mozilla បានបញ្ចេញលក់ស្មាតហ្វូនប្រើ Firefox OS នៅតាមបណ្ដាក្រុមហ៊ុនសេវាទូរស័ព្ទមួយចំនួន ហើយផលិតផលរបស់ពួកគេ គឺស្ថិតក្នុងលំដាប់ស្មាតហ្វូនធុនមធ្យម មិនសូវមានការចាប់អារម្មណ៍ពីសាធារណជនឡើយ។ ខាងក្រោមនេះគឺជាសេចក្ដីថ្លែងការណ៍របស់អនុប្រធានជាន់ខ្ពស់ផ្នែកផលិតផលរបស់ Mozilla លោក Ari Jaaksi ដែលបានថ្លែងប្រាប់គេហទំព័រ TechCrunch៖
«យើងមានមោទនភាពចំពោះអត្ថប្រយោជន៍បានពី Firefox OS ពាក់ព័ន្ធនឹង Web platform ហើយនឹងបន្តស្វែងរកបទពិសោធន៍ថ្មីដល់អ្នកប្រើប្រាស់ តាមរយៈផលិតផលរបស់ខ្លួន។ យើងនឹងបង្កើតអ្វីដែលមានលក្ខណៈ ពិសេសលេចធ្លោ ស្ថិតក្នុងគម្រោងបើកចំហ (open source project) តម្រូវតាមតម្រូវការរបស់អ្នកជាចម្បង ហើយបង្កើត tool ដែលជួយធ្វើឲ្យប្រព័ន្ធ ecosystem រីកចម្រើន»។
iOS របស់ Apple និង Android OS របស់ Google បច្ចុប្បន្នបានបន្តកាន់កាប់ចំណែកទីផ្សារប្រព័ន្ធប្រតិបត្តិការឧបករណ៍ចល័តច្រើនជាងគេ ហើយទន្ទឹមនោះ ក៏មានក្រុមហ៊ុនទូរស័ព្ទខ្លះ កំពុងចាប់អារម្មណ៍បង្កើត mobile OS ផ្ទាល់ខ្លួនដែរ ជាក់ស្ដែងដូចជា ក្រុមហ៊ុន Samsung ដែលបានដាក់ចេញសូហ្វ៊ែរ Tizen OS រួចមកហើយ៕
