កម្មវិធី Facebook សម្រាប់​ទូរស័ព្ទ​ដៃ ចាប់ពី​ពេល​នេះ នឹង​ធ្វើឲ្យ​អ្នក​មិន​ខ្លាច​ខក​ខាន​ក្នុង​ការ​បង្ហោះ (Post) ទៀត​នោះ​ឡើយ ព្រោះ​ក្រុមហ៊ុន​ទើបតែ​ដាក់​ចេញ​មុខងារ Offline សម្រាប់​ឱ្យ​គេ​អាច​បង្ហោះ News Feed របស់​ខ្លួន ទោះបី​ទូរស័ព្ទ​អត់អ៊ីនធឺណិត​ក៏​ដោយ។ Facebook បាន​ប្រកាស​នៅ​ថ្ងៃ​នេះ​ថា News Feed នៅ​លើ​កម្មវិធី នឹង​នៅ​តែអាច​ឱ្យ​គេ​​សរសេរ​​នូវ Post ថ្មីៗ ខណៈ ដែល​អ្នក​ប្រើ​ស្ថិត​នៅ​តំបន់​គ្មាន​អ៊ីនធឺណិត​ក៏​ដោយ។ អ្នក​ប្រើ​ថែមទាំង​អាច​សរសេរ​បញ្ចេញ​មតិ (comment) ផង​ដែរ ហើយ​ដំណើរការ​បង្ហោះ​ផ្សេងៗ នឹង​អាច​ប្រព្រឹត្តិ​ដោយ​ស្វ័យប្រវត្តិ​នៅ​ពេល​ទូរស័ព្ទ​របស់​អ្នក​ភ្ជាប់​ជាមួយ​អ៊ីនធឺណិត​ភ្លាមៗ។ នេះ​បើ​តាម​ក្រុមហ៊ុន Facebook បញ្ជាក់​នៅ​លើ​ប្លុក (blog) របស់​ខ្លួន។ ក្រុមហ៊ុន​ថែមទាំង​ពន្យល់​ថា៖ «​មុខងារ​នេះ នឹង​ជួយ​អ្នក​លេង Facebook ដែល​ខ្សត់ខ្សោយ​អ៊ីនធឺណិត​ប្រើ នៅ​តែ​អាច​រីករាយ​ជាមួយ​បណ្ដាញ​ទំនាក់ទំនង​សង្គម​របស់​ខ្លួន ទោះបី​គេ​ស្ថិត​នៅ​ទីកន្លែង​សាធារណៈ​គ្មាន​ WiFi ក៏​ដោយ»។ រាល់ Post ផ្សេងៗ​នឹង​នៅ​តែ​អាច​បើក​មើល​បាន​ជា​ធម្មតា​ស្រប​ទៅ​តាម​ទំនាក់ទំនង algorithm របស់ Facebook ទោះបី​ទូរស័ព្ទ​ចាក់ចេញ​ពី​ដែន​អ៊ីនធឺណិត​ក៏​ដោយ។ នៅ​ពេល​ទូរស័ព្ទ​មាន​អ៊ីនធឺណិត​វិញ នោះ​វា​នឹង​ធ្វើ​បច្ចុប្បន្នភាព​ដោយ​ភ្ជាប់​ទំនាក់ទំនង​ទៅ​កាន់​ម៉ាស៊ីន​មេ (server) របស់ Facebook ដើម្បី​បង្ហាញ​នូវ​មាតិកា​ថ្មីៗ​បន្ថែម​ទៀត។ ក្រុមហ៊ុន Facebook បាន​និយាយ​ថា បច្ចុប្បន្ន​មុខងារ​នេះ​កំពុង​ស្ថិត​ក្នុង​ដំណាក់កាល​ធ្វើតេស្ត។ គេ​ជឿ​ថា បណ្ដា​អ្នក​លេង Facebook សព្វថ្ងៃ​ពិត​ជា​ពេញ​និយម​លេង​បណ្ដាញ​សង្គម​យក្ស​នេះ​យ៉ាង​ខ្លាំង ហើយ​គេ​ចូលចិត្ត​បង្ហោះ និង Share អ្វីៗ​ជាច្រើន​នៅ​លើ Facebook ខណៈ​ដែល​ទូរស័ព្ទ​គេ​អត់​អ៊ីនធឺណិត។ ដូច្នេះ​មុខងារ​ថ្មី​នេះ នឹង​ជួយ​គេ​ក្នុង​ការ​កម្សាន្ត​ឥត​ដែន​កំណត់ ដោយ Post ឬ Comment របស់​គេ​អណ្ដែត​ចេញ​បាន​នៅ​ពេល​ទូរស័ព្ទ​មាន​អ៊ីនធឺណិត​វិញ៕