អនុប្រធាន​គ្រប់គ្រង​ផលិតផល​របស់ Google លោក Caesar Sengupta ​ក្នុង​ព្រឹត្តិការណ៍​របស់​ក្រុមហ៊ុន​នៅ​ក្រុង New Deli ប្រទេស​ឥណ្ឌា​កាលពី​ពេល​ថ្មីៗ​នេះ បាន​បង្ហាញ​មុខងារ​ថ្មី​ពិសេស​ទៅ​លើ​សេវាកម្ម​បកប្រែ​ភាសា។ មុខងារ​ថ្មី​នេះ មាន​ឈ្មោះ​ថា Tap to Translate គឺ​នឹង​ផ្ដល់​ភាព​ងាយស្រួល​សម្រាប់​អ្នក​ដែល​ត្រូវការ​បកប្រែ​សារ​ទូរស័ព្ទ (message) ច្រើន ព្រោះ​មុខងារ​ថ្មី​នេះ នឹង​មិន​ចាំបាច់​ឱ្យ​អ្នក​ប្រើ ចាកចេញ​ពី message app ដើម្បី​បើក Google Translate តទៅ​ទៀត​ឡើយ។

លោក Sengupta បាន​និយាយ​ថា៖ «​ប្រជាជន​ឥណ្ឌា​ភាគច្រើន​តែង​បកប្រែ​ទៅ​មក​រវាង​ភាសា Hindi និង​ភាសា​អង់គ្លេស ច្រើន​ដង​ក្នុង​មួយ​ថ្ងៃៗ ហើយ​គេ​ចំណាយ​ពេល​ច្រើន​បន្តិច​ទម្រាំ​បកប្រែ​រួច ព្រោះ​ត្រូវ​ចម្លង (copy) សារ (message) របស់​ភាគី​ទៅ past ក្នុង​កម្មវិធី​បកប្រែ​ដើម្បី​យល់​សារ ហើយ​ឆ្លើយតប​ទៅ​វិញ​ដោយ​ប្រើ​ភាសា​ខ្លួន បកប្រែ​តាម​កម្មវិធី រួច​ហើយ copy មក past ក្នុង​កម្មវិធី​សារ (message) វិញ»។

ប៉ុន្តែ​ឆាប់ៗ​ខាង​មុខ លោក​អ្នក​នឹង​លែង​ពិបាក​បែប​នេះ​ទៀត​ហើយ ព្រោះ​ក្រុមហ៊ុន​នឹង​បន្ថែម​មុខងារ​បកប្រែ Tap to Translate ដើម្បី​ឱ្យ​អ្នក​ប្រើ​អាច copy អក្សរ​នៅ​លើ​ឧបករណ៍ Android ដែល​មាន​ដូច​ជា​កម្មវិធី​ផ្ញើ​សារ​ទូរស័ព្ទ (message) នោះ រួច​បក​ប្រែ​តាម​ផ្ទាំង​កម្មវិធី​ដែល​អណ្ដែត​នៅ​លើ​អេក្រង់​តែ​ម្ដង។ អ្នក​អាច​បង្កើត​សារ (compose) ហើយ copy ​អក្សរ​ដែល​បាន​បកប្រែ​រួច​ផ្ញើ​ត្រឡប់​ភាគី​ម្ខាង​បាន ដោយ​មិន​ចាំបាច់​ត្រូវ​ចេញ​ពី​កម្មវិធី​ដែល​អ្នក​កំពុង​ប្រើ​នោះ​ឡើយ។ មុខងារ​ពិសេស Tap to Translate នេះ​ត្រូវ​គេ​រំពឹង​ថា នឹង​អាច​ដំណើរការ​បាន​នៅ​លើ​ឧបករណ៍ Android ​ក្នុង​ត្រីមាស​ទី១ ឆ្នាំ២០១៦ ខាង​មុខ៕