Google និង Ford នឹងបង្កើតក្រុមហ៊ុនថ្មីមួយទៀត ដែលផ្ដោតអភិវឌ្ឍតែទៅលើវិស័យរថយន្តស្វ័យប្រវត្តិ។ នេះបើយោងតាមរបាយការណ៍ពីគេហទំព័រ Yahoo! Autos។ ការចាប់ដៃសហការគ្នារវាងក្រុមហ៊ុនទាំងពីរ នឹងត្រូវលាតត្រដាងនៅក្នុងព្រឹត្តិការណ៍ CES ខែក្រោយ (ឆ្នាំ២០១៦) នេះហើយ។
កាលពីសប្ដាហ៍មុន ក្រុមហ៊ុន Google បាននិយាយថា ខ្លួននឹងជំរុញកិច្ចខិតខំប្រឹងប្រែងក្នុងវិស័យរថយន្តអូតូរបស់ខ្លួន ហើយនឹងលោតចេញជាក្រុមហ៊ុនសាជីវកម្មមួយដាច់ដោយឡែកគឺ Alphabet Corporation ហើយការសហការគ្នានេះក៏អាចពាក់ព័ន្ធនឹងក្រុមហ៊ុន Alphabet ដែរ។
ការសហការគ្នានេះ នឹងផ្ដល់ជាផលប្រយោជន៍ដល់ភាពទាំងពីររៀងៗខ្លនដែលក្រុមហ៊ុនចង់បាន។ Google អាចទទួលបានជំនាញបន្ថែមក្នុងការផលិតរថយន្ត ខណៈដែល Ford ក៏នឹងបានប្រយោជន៍លើការស្រាវជ្រាវបច្ចេកវិទ្យាបើកបរស្វ័យប្រវត្តិជាលក្ខណៈ real-world ជាច្រើនឆ្នាំរបស់ Google ដែរ។
ក្រុមហ៊ុនទាំងពីរបានធ្វើការលើរថយន្តស្វ័យប្រវត្តិអស់ជាច្រើនឆ្នាំមកហើយ។ តាមរយៈការខិតខំរបស់ Google ក៏ចាប់ទទួលបានផ្លែផ្កាបង្ហាញជាសាធារណៈជាបណ្ដើរៗហើយដែរ។ ក្រុមហ៊ុនបានធ្វើតេស្តលើស៊េរីរថយន្តស្វ័យប្រវត្តិប៉ុន្មានគ្រឿង នៅលើផ្លូវសាធារណៈក្នុងរដ្ឋកាលីហ្វូរញ៉ា និងតិចសាស់។ ចំណែក Ford ថ្មីៗនេះទើបទទួលបានការយល់ព្រមឱ្យធ្វើតេស្តរថយន្តស្វ័យប្រវត្តិរបស់ខ្លួននៅលើផ្លូវរដ្ឋកាលីហ្វូរញ៉ាទេ។
ក្រុមហ៊ុន Ford នឹងមានសន្និសីទសារព័ត៌មានមួយនៅអំឡុងព្រឹត្តិការណ៍ CES 2016 គឺចំថ្ងៃអង្គារ ទី៥ ខែមករាដើមឆ្នាំក្រោយ៕
