នាយកប្រតិបត្តិ Google៖ ក្រុមហ៊ុនវៀតណាមនឹងជោគជ័យលក្ខណៈសកល
នាយកប្រតិបត្តិក្រុមហ៊ុន Google លោក Sundar Pichai បានធ្វើទស្សនកិច្ចនៅប្រទេសវៀតណាមដោយផ្ដល់ក្ដីសង្ឃឹមទៅដល់ក្រុមហ៊ុនដែលទើបនឹងបង្កើតថ្មីៗថាក្រុមហ៊ុនទាំងនោះនឹងទទួលបានជោគជ័យលក្ខណៈសកល។
ថ្លែងទៅកាន់មនុស្សប្រមាណ ២០០នាក់នៅក្នុងហាងកាហ្វេមួយកន្លែងនៅទីក្រុងហាណូយកាលពីថ្ងៃអង្គារ កន្លងទៅ លោក Pichai បានឱ្យដឹងថា លោកមើលមិនឃើញហេតុផលណាមួយដែលប្រទេសវៀតណាមមិនអាចជោគជ័យលក្ខណៈនោះទេ បើមើលទៅលើទំហំទីផ្សារក្នុងស្រុក ការប្រើប្រាស់អ៊ីនធឺណិតដ៏ច្រើនលើសលប់ និងវប្បធម៌នៃការរកស៊ីដ៏រឹងមាំ។ លោកបានបញ្ជាក់ដូច្នេះថា ៖«ខ្ញុំគិតថា វាជាបញ្ហាពេលវេលាប៉ុណ្ណោះ ហើយខ្ញុំគិតថា មនុស្សជាច្រើននាក់កំពុងតែចាប់ផ្ដើមធ្វើកិច្ចការនោះទៅហើយ»។
នាយកប្រតិបត្តិរូបនេះ ថែមទាំងបានថ្លែងបន្តថា ប្រជាជនវៀតណាមគួររៀនសូត្របទពិសោធន៍ពីអ្នករកស៊ីនៅប្រទេសឥណ្ឌា ដែលបានចាប់ផ្ដើមពីការផ្ដោតទៅលើទីផ្សារក្នុងស្រុក ហើយនៅពេលដែលពួកគេមានកម្លាំងគ្រប់គ្រាន់ ពួកគេចាប់ផ្ដើមលោតទៅទីផ្សារខាងក្រៅ៕ ដោយ៖ រតនៈវិភូ ប្រភព៖ inc.com
