របាយការណ៍មួយចេញពីប្រទេសប៉ូឡូញបានលើកឡើងថា លោកអ្នកអាចត្រូវត្រៀមលុយច្រើនបន្តិច ក្នុងការធ្វើជាម្ចាស់កំពូលទូរស័ព្ទជំនាន់ថ្មីរបស់ Samsung គឺ Glalaxy S7 ដែលនឹងសម្ពោធចេញដើមឆ្នាំ២០១៦។ មូលហេតុមួយដែលអាចធ្វើឲ្យតម្លៃទូរស័ព្ទ Galaxy ជំនាន់ទី៧ នេះឡើងខ្ពស់ជាងស៊េរីមុន គឺដោយសារបំពាក់បច្ចេកវិទ្យាទំនើបស្កេនប្រស្រីភ្នែក។
របាយការណ៍ថ្មីៗនេះបានលើកឡើងថា ហេតុផលមួយដែលធ្វើឲ្យតម្លៃ Galaxy S7 ហក់ឡើងខ្ពស់ជាង Galaxy ជំនាន់មុនៗ គឺដោយសារទូរស័ព្ទនេះ បំពាក់បច្ចេកវិទ្យាថ្មីស្កេនប្រស្រីភ្នែក។ តាមរយៈបច្ចេកវិទ្យាទំនើបនេះ នឹងអាចឱ្យគេប្រើសម្រាប់ដោះសាទូរស័ព្ទ (unlock), សម្រាប់ផ្ទៀងផ្ទាត់អត្តសញ្ញាណរបស់អ្នក ហើយអាចប្រើលើកិច្ចការផ្សេងៗទៀតដែល មុខងារស្កេនក្រយៅដៃកន្លងទៅធ្វើបាន។ ដោយសារមនុស្សម្នាក់ៗមានប្រស្រីភ្នែកខុសៗគ្នា ដូច្នេះជីវមាត្រនេះ អាចត្រូវបានយកទៅអភិវឌ្ឍប្រើសម្រាប់ជាមុខងារស្កេនប្រស្រីភ្នែកបានយ៉ាងល្អ។
គេរំពឹងថា Galaxy S7 នឹងត្រូវ Samsung ប្រកាសចេញនៅអំឡុងខែកុម្ភៈ ឬខែមីនា ឆ្នាំក្រោយ។ Galaxy S7 អាចមានអេក្រង់ ៥,១អ៊ីញប្រភេទ Super AMOLED ជាមួយ resolution ទំហំ 1440p ដំណើរការដោយ Android Marshmallow, RAM 4GB, អង្គចងចាំ 32GB/64GB ប្រើកញ្ចក់ Gorilla Glass 5 និងបំពាក់ឈីប Exynos 8890 ឬ Snapdragon 820៕
