Samsung Electronics ​​ដែល​ជា​ក្រុមហ៊ុន​ផលិត​ស្មាតហ្វូន​នាំ​មុខ​គេ​លើ​ពិភពលោក ត្រូវ​គេ​រាយការណ៍​ថា មាន​គម្រោង​ផលិត​ទូរស័ព្ទ Galaxy S7 ​ចំនួន ៥លាន​គ្រឿង​ក្នុង​សង្វាក់​ផលិតកម្ម​ដំបូង​នេះ។ នេះ​បើ​តាម​សេចក្ដី​រាយការណ៍​ពី​ប្រភព​សុំ​មិន​បញ្ចេញ​ឈ្មោះ​ពី​កាសែត Electronic Times របស់​កូរ៉េ​ខាងត្បូង​ឱ្យ​ដឹង​នៅ​ថ្ងៃ​ច័ន្ទ​ម្សិលមិញ។ ប្រភព​ដដែល​បន្ត​ថា ក្រុមហ៊ុន Samsung ​ថែមទាំង​មាន​គម្រោង​ផលិត Galaxy ជំនាន់​ទី៧ របស់​ខ្លួន​ចែក​ចេញ​ជា​ពីរ​ជំនាន់ ដែល​មាន​ទំហំ​អេក្រង់​ផ្សេង​គ្នា មួយ​ទំហំ ៥,២អ៊ីញ​មាន​ផ្ទៃ​រាប​ស្មើ និង​មួយ​ទៀត​ទំហំ ៥,៥អ៊ីញ​ភ្ជាប់​អេក្រង់​កោង​បញ្ឆិត​ដែល​អាច​មាន​ឈ្មោះ Galaxy S7 edge។ របាយការណ៍​អះអាង​ទៀត​ថា ក្រុមហ៊ុន Samsung ​មាន​គម្រោង​ផលិត Galaxy S7 ​អេក្រង់​រាប ចំនួន៣,៣លាន​គ្រឿង ចំណែក Galaxy S7 edge ចំនួន ១,៦លាន​គ្រឿង នឹង​ចេញ​លក់​ទីផ្សារ​ក្នុង​ខែ​កុម្ភៈ ឆ្នាំ​ក្រោយ។ យ៉ាងណា ពេល​នេះ​អ្នក​នាំ​ពាក្យ​របស់ Samsung បដិសេធ សុំ​មិន​បញ្ចេញ​យោបល់​ទៅ​នឹង​របាយការណ៍​ខាង​លើ​នៅ​ឡើយ៕