បើ​ទោះបី​វ៉ែនតា Google Glass ​មិន​ទាន់​ទទួល​ភាព​ជោគជ័យ​ក៏​ដោយ ប៉ុន្តែ​ក្រុមហ៊ុន​អ៊ីនធឺណិត​យក្ស Google ​ហាក់​មិន​ទាន់​ចង់​បោះបង់​ចោល​នូវ​គម្រោង​ផលិត​វ៉ែនតា​ឆ្លាតវៃ​ជំនាន់​ទី២ នេះ​នៅ​ឡើយ។ វ៉ែនតា​ជំនាន់​ទី២ នឹង​មាន​ឈ្មោះ Google Glass: Enterprise Edition ដែល​នឹង​ត្រូវ​ផលិត​សម្រាប់​គោលដៅ​ទីផ្សារ​ខ្នាត​សហគ្រាស (Enterprise market) ពោល​មិនមែន​សម្រាប់​ទីផ្សារ​អ្នក​ប្រើ​ទូទៅ​នោះ​ទេ។ ខាងក្រោម​នេះ គឺ​ជា​រូបថត​ដែល​ត្រូវ​គេ​អះអាង​ថា ជា​វ៉ែនតា​ជំនាន់​ថ្មី​របស់ Google។

ផ្អែក​តាម​រូប Google Glass ថ្មី​ខាង​លើ អាច​ឱ្យ​គេ​មើល​ពី​រាងរៅ​វ៉ែនតា​ជំនាន់ទី២ នេះ ដែល​មាន​រចនាបថ​ទាន់សម័យ ស្អាត​ជាង​មុន។ វា​ជា​ដង​វ៉ែនតា​សម្រាប់​ពាក់​លើ​ត្រចៀក​ខាង​ស្ដាំ ភ្ជាប់​​អេក្រង់​តូច​មួយ​នៅ​លើ​នោះ។ លើស​ពី​នេះ វា​ថែមទាំង​បំពាក់​កាមេរ៉ា​នៅ​ផ្នែក​ខាង​លើ ដើម្បី​អាច​ផ្ដិត​យក​រូបភាព​តាម​ដងផ្លូវ​ដែល​អ្នក​កំពុង​ធ្វើ​ដំណើរ​បាន។ វ៉ែនតា Google ជំនាន់​ថ្មី​នេះ នឹង​ត្រូវ​ផលិត​យ៉ាង​រឹងមាំ​ជាង​មុន បង្ហាញ​អាក់​ធំ​ជាង​មុន និង​មាន​ដង​តម្រូវ​ត្រចៀក​ធំ​ជាង​មុន ដែល​អាច​បត់​បាន តម្រូវ​តាម​មនុស្ស​មាឌ​ធំ។ គេហទំព័រ 9to5Google ​បាន​ឱ្យ​ដឹង​ថា Google Glass: Enterprise Edition ​នឹង​មាន​បច្ចេកវិទ្យា​មិន​ចូល​ទឹក ហើយ​អាច​ការពារ​ពី​ កម្ទេចកំទី ឬ​អំបែង ឬ​វត្ថុផ្សេងៗ​ដែល​នាំ​ឱ្យ​ប៉ះពាល់​ដល់ hardware បាន៕