ប្រមាណជិតពាក់កណ្ដាលនៃឧបករណ៍អេឡិចត្រូនិកចល័ត (mobile device) ទាំងអស់ដែលបានលក់ចេញនៅរដូវវិស្សមកាលចុងឆ្នាំ២០១៥ នេះគឺសុទ្ធតែជាផលិតផលរបស់ក្រុមហ៊ុន Apple។ នេះបើយោងតាមរបាយការណ៍ថ្មីមួយពីក្រុមហ៊ុនវិភាគទីផ្សារ Flurry។ ក្នុងនោះ ក្រុមហ៊ុន Apple បានក្ដោបក្ដាប់ចំណែកទីផ្សារបាន ៤៩,១% ខណៈដែល Samsung យកបានត្រឹម ១៩,៨%។
ផលិតផលអេឡិចត្រូនិកចល័តរបស់ Samsung លក់ចេញនៅរដូវវិស្សមកាលចុងឆ្នាំ២០១៥នេះ យកបាន ១៩,៨% ដែលអត្រានេះមានការកើនឡើង ២,១% ប្រៀបធៀបនឹងឆ្នាំទៅ។ រីឯ Nokia, LG និង Xiaomi ក្ដាប់ចំណែកទីផ្សាររៀងខ្លួនគឺ ២,០%, ១,៧% និង ១,៥%។ តាមក្រាបខាងលើគេពុំបានឃើញឈ្មោះក្រុមហ៊ុន Sony ជាប់ជាក្រុមហ៊ុនទូរស័ព្ទដែលលក់ដាច់ជាងគេទាំង ៥ក្រុមហ៊ុននោះទេ។
ងាកមកមើលក្រាបខាងលើនេះទៀត គេឃើញថា ប្រភេទទូរស័ព្ទដែលលក់ដាច់ខ្លាំងជាងគេនោះគឺទូរស័ព្ទទំហំសមល្មម (Medium Phone) ដែលមានចំណែកទីផ្សាររហូតដល់ ៥៤% ខណៈដែលផេប្លេត (Phablet) មាន ២៧% ហើយថេប្លេតទំហំតូចៗ (Small Tablet) និងថេប្លេតទំហំពេញ (Full-size Tablet) លក់បាន ៩% ដូចគ្នា។ ទីផ្សារតិចជាងគេនោះគឺទូរស័ព្ទទំហំតូច (Small Phone) ដែលមានតែ ១% ប៉ុណ្ណោះ។
ចំណែកក្រាបខាងលើនេះវិញ បង្ហាញពីចំណែកទីផ្សារប្រព័ន្ធប្រតិបត្តិការទូរស័ព្ទ ដែលបង្ហាញថា អ្នកដែលទិញប្រើឧបករណ៍ Android ច្រើនតែជ្រើសរើសយកផេប្លេត (Phable) មានដល់ទៅ ៥០%។ រីឯអ្នកដែលទិញឧបករណ៍ iOS ច្រើនតែជ្រើសរើសយកទូរស័ព្ទទំហំសមល្មម (Medium Phone) មានដល់ទៅ ៦៥%៕
