ពីទូរសព្ទប្រើសម្រាប់តែខលឆ្លើយឆ្លងគ្នាធម្មតា រហូតត្រូវបានក្រុមហ៊ុនបច្ចេកវិទ្យាធំៗលើពិភពលោកធ្វើបដិវត្តបច្ចុប្បន្នភាពកាន់តែទំនើបសំបូរមុខងារជាច្រើនត្រូវបានហៅឈ្មោះថា ស្មាតហ្វូន។ យ៉ាងណា ស្មាតហ្វូនដែលកំពុងចរាចរលើទីផ្សារបច្ចុប្បន្ននេះ មានសមត្ថភាពខុសៗខុស ការឌីហ្សាញផ្សេងគ្នា រីឯតម្លៃក៏ខុសគ្នាទៅតាមនោះដែរ។ ទំព័រនេះសារព័ត៌មាន BizKhmer សូមបង្ហាញជូនស្មាតហ្វូនដែលមានតម្លៃថ្លៃបំផុត ៨គ្រឿងប្រចាំឆ្នាំ២០១៥៖
៨) Gresso Azimuth A1 (តម្លៃ ២០០០ដុល្លារ)
ជាស្មាតហ្វូនស៊ីម២ ដំបូងរបស់ក្រុមហ៊ុន Gresso ម៉ូដែល Azimuth A1 ត្រូវបានឌីហ្សាញផលិតពីសារធាតុទីតាញ៉ូមគុណភាពខ្ពស់បំផុត ប្រើកញ្ចក់ខនិជ (mineral glass) សម្រាប់ធ្វើជាផ្ទៃអេក្រង់ខាងមុខនៃទូរស័ព្ទ។
៧) Samsung W2015 ជាទូរស័ព្ទបត់យ៉ាងប្រណិត (តម្លៃ ២៤៥០ដុល្លារ)
Samsung បានបញ្ចេញស្មាតហ្វូនល្អបំផុត និងមានតម្លៃថ្លៃលើលោក ជាមួយម៉ូដែល W2015 នេះ។ វាជាស្មាតហ្វូនបត់ (Flip Smartphone) ដែលក្រុមហ៊ុនផលិតឡើងសម្រាប់វាយលុកលើទីផ្សារស្មាតហ្វូនប្រណិតៗក្នុងឆ្នាំ២០១៥។ ស្មាតហ្វូននេះមានកាមេរ៉ា 16MP ដំណើរការដោយសូហ្វ៊ែរ Android KitKat។
៦) iPhone 6 ដោយក្រុមហ៊ុន Gresso (តម្លៃ ៤០០០ដុល្លារ)
ខណៈដែលទូរស័ព្ទ iPhone ជាធម្មតាមានតម្លៃមិនថោកស្រាប់ទៅហើយនោះ រីឯ iPhone 6 ស្ថិតក្រោមការច្នៃឌីហ្សា្របស់ Gresso នឹងរឹតតែធ្វើឲ្យដំឡើងទូរស័ព្ទទំនើបនេះហក់ឡើងខ្ពស់ថែមទៀត។ ក្រុមហ៊ុនបានផលិតសំបក iPhone ពីសារធាតុទីតាញ៉ូមនិងមាស 18K។
៥) Gresso Regal Titanium (តម្លៃ ៥០០០ដុល្លារ)
ជាទូរស័ព្ទទំនើប មានតួផលិតពីសារធាតុទីតាញ៉ូម និងទូរស័ព្ទនីមួយៗត្រូវបានផលិតដោយដៃផ្ទាល់។ ទូរស័ព្ទនេះត្រូវបានផលិតលក់ក្នុងចំនួនមានកំណត់ត្រឹមតែ ៣៣៣គ្រឿងប៉ុណ្ណោះ និងបានធ្វើឱ្យវាជាប់ឈ្មោះជាទូរស័ព្ទតម្លៃថ្លៃក្នុងលោកមួយដែរ។
៤) Gresso Regal Black Edition (តម្លៃ ៥០០០ដុល្លារ)
ក្រុមហ៊ុនបានផលិតទូរស័ព្ទនេះ ដោយមានតួផ្សំពីសារធាតុទីតាញ៉ូម និងមាស 18K ទើបធ្វើឱ្យវាក្លាយជាទូរស័ព្ទមួយមានតម្លៃថ្លៃ ក្នុងចំណោមទូរស័ព្ទទាំង៨ ប្រចាំឆ្នាំ២០១៥។
៣) Gresso Regal Gold Edition (តម្លៃ ៦០០០ដុល្លារ)
ទូរស័ព្ទនេះមានមុខងារដូចជា Gresso Regal Black Edition ដែរ។ ចំណុចខុសគ្នាតែមួយគឺនៅលើតម្លៃ ដោយសារសារធាតុផ្សំខុសគ្នា។ Gresso Regal Gold Edition ត្រូវបានផលិតពីសារធាតុពិសេសជាថ្នាំកូតទឹកមាស pvd គុណភាពខ្ពស់។
២) Tonino Lamborghini 88 Tauri (តម្លៃ ៦០០០ដុល្លារ)
ជាទូរស័ព្ទមានតម្លៃថ្លៃបំផុតមួយលើលោកប្រចាំឆ្នាំ២០១៥ នេះផងដែរ។ ទូរស័ព្ទនេះជាសមិទ្ធផលរបស់ក្រុមហ៊ុនរថយន្ត Lamborghini ហើយត្រូវបានផលិតជាពិសេស គុណភាពខ្ពស់ ចំណែកថ្មរបស់វាអាចកាន់បាន ១០០០ម៉ោង (សម្រាប់ការបើកទុកចោល ឬ standby)។ ក្រុមហ៊ុនផលិត ដាក់លក់នៅលើទីផ្សារតែ ១០៥០គ្រឿងប៉ុណ្ណោះ។
១) Vertu Aster Diamonds Red Alligator (តម្លៃ ១០៥៥០ដុល្លារ)
ជាផលិតផលរបស់ក្រុមហ៊ុន Vertu ដែលមានតម្លៃថ្លៃបំផុតប្រចាំឆ្នាំ២០១៥។ ទូរស័ព្ទនេះត្រូវបានស្រោបដោយពេជ្រស ៥៥គ្រាប់ ដែលមួយគ្រាប់ៗតម្លៃស្មើ ០,៥៥ការ៉ាត់។ មិនតែប៉ុណ្ណោះ តួរបស់វាថែមទាំងពាសដោយស្បែកក្រពើពណ៌ក្រហមយ៉ាងមានអំណាច៕
