ព័ត៌មាន​ជុំវិញ​រន្ធ​កាស​ទំហំ ៣,៥មិល្លីម៉ែត្រ​ដែល​ត្រូវ​គេ​រំពឹង​ថា នឹង​ត្រូវ​ក្រុមហ៊ុន Apple ​ដក​ចេញ​ពី iPhone 7 ​នោះ ពេល​នេះ​មាន​ពន្លឺ​ថ្មី​បន្ថែម។ របាយការណ៍​ពី MacRumor ​ទទួល​បាន​អំពី​ខ្សែ​សង្វាក់​ផ្គត់ផ្គង់​របស់ Apple បាន​អះអាង​ថា Apple ​ប្រាកដ​ជា​នឹង​ដក​ចោល​រន្ធ​កាស 3.5mm audio jack ​ហើយ​ប្រើ​រន្ធ​សាក​ថ្ម Lightning ​មក​ធ្វើ​ជា​រន្ធ​កាស​ជំនួស។ សេចក្ដី​រាយការណ៍​នេះ គឺ​ចេញ​ពី​គេហទំព័រ​ចិន​ចំនួន២ គឺ Anzhou និង Wei Fang ​ដែល​ទទួល​បាន​ព័ត៌មាន​ជាក់លាក់​ពី​ខ្សែ​សង្វាក់​ផ្គត់ផ្គង់​របស់ Apple ​ពាក់ព័ន្ធ​នឹង​ការ​ផ្លាស់ប្ដូរ​របៀប​នៃ​ការ​ប្រើ​កាស​នៅ​លើ​ទូរស័ព្ទ iPhone 7។ ​ក្រុមហ៊ុន Apple ​ត្រូវ​គេ​រំពឹង​ថា ក៏​នឹង​បញ្ចេញ adapter ​ដែល​អាច​ឱ្យ​គេ ដោត​ប្រើ​ជាមួយ​កាស​ទូទៅ​សម្រាប់​ប្រើ​នៅ​លើ iPhone 7 ​បាន​ផង​ដែរ ប៉ុន្តែ​មិន​ច្បាស់​ថា នឹង​ដាក់​បញ្ចូល​ទៅ​ក្នុង​ប្រអប់​ស្រាប់ ឬ​មួយ​ត្រូវ​ទិញ​នៅ​ខាង​ក្រៅ​នោះ​ទេ។

គំរូ iPhone 7

iPhone 7 និង iPhone 7 Plus ​ក៏​នឹង​មាន​ការ​ផ្លាស់ប្ដូរ​ផ្សេង​ទៀត ដូច​ជា បំពាក់​អង្គ​ប្រតិបត្តិ Apple 10 ​ល្បឿន​លឿន​ជាង​មុន ហើយ​មាន RAM ​ធំ​ជាង​មុន​ផង​ដែរ គឺ​ទំហំ 3GB ដូច​គ្នា។ ចំណែក​អង្គ​ចងចាំ​ក៏​ត្រូវ​បន្ថែម​រហូត​ដល់ 256GB និង​មាន​ថាមពល​ថ្ម​ធំ​ជាង​មុន។ ចំណុច​ពិសេស​ទៀត​នោះ iPhone 7 នឹង​ត្រូវ​ក្រុមហ៊ុន​ផ្លាស់ប្ដូរ​រចនាបថ​ថ្មី​ខុសប្លែក​ពី iPhone 6S/6S Plus ​ហើយ Apple ត្រូវ​គេ​រំពឹង​ថា នឹង​នៅ​រក្សា​ពណ៌​លើ iPhone ​ដដែល។ iPhone 7 ​ត្រូវ​គេ​រាយការណ៍​មក​ថា នឹង​មាន​បច្ចេកវិទ្យា​មិន​ចូល​ទឹក (waterproof) ថែមទៀត។ គេ​រំពឹង​ថា iPhone 7 នឹង​ត្រូវ Apple សម្ពោធ​ចេញ​ផ្លូវការ​នៅ​ខែ​សីហា ឬ​កញ្ញា ហើយ​ក៏​មាន​ពាក្យ​ចចាមអារ៉ាម​ថា នឹង​មាន iPhone 6C ​ឬ iPhone 7C ​ទំហំ ៤អ៊ីញ​មួយ​ទៀត​ចេញ​មុន គឺ​នៅ​អំឡុង​ខែ​មេសា៕