របៀបស្វែងរកកម្មវិធី និងហ្គេម Android ដែលអ្នកបានលុប (Uninstall) ដើម្បីដំឡើង (reinstall) ឡើងវិញ
ស្មាតហ្វូន Android របស់អ្នកអាចនឹងត្រូវ Format នៅពេលណាមួយ ដែលជាហេតុនាំឱ្យបាត់កម្មវិធី និងហ្គេមទាំងឡាយចេញពីទូរស័ព្ទ។ ម្យ៉ាងពេលខ្លះ អ្នកក៏ប្រហែលលុប ឬបង្ខំចិត្តលុប app មួយចំនួនចេញពីទូរស័ព្ទ ដោយសារពេញមេម៉ូរីទូរស័ព្ទពេក។ ចុះ ប្រសិនបើចង់ស្វែងរកកម្មវិធីដែលបាន Uninstall រួច ដើម្បី reinstall ឡើងវិញ តើត្រូវធ្វើដូចម្ដេច? ទំព័រនេះ យើងនឹងបង្ហាញអំពីរបៀបស្វែងរកកម្មវិធី និងហ្គេម Android ទាំងឡាយដែលបាន Uninstall ដើម្បីដំឡើងនៅលើទូរស័ព្ទសាជាថ្មី (reinstall)។
សូមបញ្ជាក់ថា កម្មវិធី និងហ្គេមប្រមាណ ១,៥លាន ត្រូវបានដាក់ឱ្យទាញយកនៅលើ Google Play (គិតត្រឹមឆ្នាំ២០១៥)។
ក្រុមហ៊ុន Google អនុញ្ញាតឱ្យអ្នកងាយស្រួលឆែករកតាមរយៈបញ្ជីកម្មវិធីដែលអ្នកបាន uninstall ឬបានលុបចេញពីទូរស័ព្ទពីពេលមុន ដើម្បីទាញយកមកដំឡើង (reinstall) វិញ។ បញ្ជីកម្មវិធីនោះ ក៏អាចឱ្យអ្នក ស្វែងរក app ដែលបានដំឡើងនៅលើទូរស័ព្ទចាស់ មក install លើទូរស័ព្ទថ្មីបានផងដែរ ដោយប្រើគណនី Google។
ដើម្បីបើកមើលបញ្ជី app ដែលអ្នកធ្លាប់បានដំឡើងពីមុន គឺត្រូវបើកចូលកម្មវិធី Google Play នៅលើទូរស័ព្ទ/ថេប្លេត របស់អ្នក។ រួចហើយចុចលើប៊ូតុង Menu (មានរូបជាបន្ទាប់ទទឹង ៣ខ្សែ) ដែលស្ថិតផ្នែកខាងលើ នៅជ្រុងខាងឆ្វេង។ នៅពេលម៉ឺនុយបានបើកឡើង ត្រូវចុចលើ “My apps & games”។ បន្ទាប់មក ចុចលើប៊ូតុង (All) នោះអ្នកនឹងអាចឆែកមើល កម្មវិធី និងហ្គេមទាំងអស់ ដែលមានទាំង uninstalled និង installed។
