រយៈពេលប៉ុន្មានសប្ដាហ៍មកនេះ មានរបាយការណ៍ថា ក្រុមហ៊ុន Apple ត្រៀមរៀបចំព្រឹត្តិការណ៍មួយនៅក្នុងខែមីនា ឆ្នាំ២០១៦ ដែលអាចនឹងសម្ពោធចេញនាឡិកា Apple Watch 2 នៅពេលនេះ ដំណាលនឹងម៉ូដែល iPhone ធូរថ្លៃដែរ (អាចជា iPhone 6C)។
របាយការណ៍ខ្លះ បានបង្ហើបថា Apple នឹងចាប់ផ្ដើមសង្វាក់ផលិតកម្មសាកល្បង លើនាឡិកាដៃ Apple Watch 2 ក្នុងខែមករានេះ ប៉ុន្តែមកដល់ពេលនេះ ហាក់ពុំឃើញមានតម្រុយអ្វីទាល់តែសោះ។ Apple អាចពន្យារពេល ក្នុងការជំរុញផលិតកម្មនាឡិកាជំនាន់ទី២ នេះ។ នេះបើផ្អែកតាមរបាយការណ៍ថ្មីមួយ។
របាយការណ៍បានបន្តទៀតថា នាឡិកា Apple Watch ជំនាន់ថ្មី នឹងមិនមានអ្វីផ្លាស់ប្ដូរជាដុំកំភួន ឬមានការកែលំអអ្វីច្រើននោះទេ ប៉ុន្តែអាចបន្ថែមលក្ខណៈពិសេសខ្លះ ហើយអាចត្រូវក្រុមហ៊ុន Apple ប្រកាសចេញនៅខែមីនា។ Apple Watch 2 អាចមិនមានអ្វីផ្លាស់ប្ដូរច្រើនឡើយ លើកឡើងតែការបំពាក់កាមេរ៉ា Facetime ប៉ុណ្ណោះ។ សូម្បីតែសូហ្វ៊ែរ ក៏អាចមិនមានការផ្លាស់ប្ដូរដែរ ប៉ុន្តែវាអាចត្រូវក្រុមហ៊ុនធ្វើការអភិវឌ្ឍច្រើនជាងនេះ នៅលើនាឡិកាទំនើបនាពេលអនាគត។
របាយការណ៍ឱ្យដឹងទៀតថា Apple អាចដៅកាលបរិច្ឆេទ ប្រារព្ធព្រឹត្តិការណ៍មួយក្នុងខែមីនា ដើម្បីប្រកាសចេញសមិទ្ធផលថ្មី អាចមានទាំង iPhone អេក្រង់ ៤អ៊ីញថ្មី (iPhone 6C ឬ iPhone 7C) ដំណាលគ្នានឹង Apple Watch 2 នេះផងដែរ៕
