វាពុំជារឿងអាថ៌កំបាំងអ្វីនោះទេ ដែលរ៉ូបូត អាចនឹងជំនួសដៃជើងមនុស្សយើងបាន ដោយសារឧស្សាហកម្មប្រភេទនេះ កំពុងមានការអភិវឌ្ឍយ៉ាងខ្លាំង។ ផ្អែកតាមការស្រាវជ្រាវរបស់អង្គការ ពិភាក្សាសេដ្ឋកិច្ចពិភពលោក ហៅកាត់ថា WEF ឱ្យដឹងថា ឆ្នាំ២០២០ ខាងមុខ មនុស្សយន្ត នឹងអាចជំនួសការងាររបស់មនុស្សយើងប្រមាណ ៥លានមុខបាន។
នេះអាចជាការគំរាមកំហែងដ៏ធំមួយ ព្រោះទីផ្សារការងាររបស់មនុស្ស អាចនឹងបាត់បង់ដោយសារ មនុស្សយន្តដណ្ដើមយកអស់។ អង្គការ WEF បានធ្វើស្ថិតិលើបណ្ដាប្រទេសចំនួន ១៥ ដែលមានចំនួនអ្នកធ្វើការប្រមាណ ១,៩លាននាក់ រួមមានប្រទេសចិន បារាំង អាល្លឺម៉ង់ ជប៉ុន មិកស៊ិក អង់គ្លេស និងអាមេរិកជាដើម។ លទ្ធផលបង្ហាញថា មានតែ ៦៥% នៃកម្លាំងពលកម្មមនុស្សប៉ុណ្ណោះ។ ក្រៅពីនេះ គឺត្រូវបានជំនួសដោយកម្លាំងមនុស្សយន្ត។
បើទោះបី ការបំឡាស់ប្ដូរនេះ អាចបង្កកង្វះការងារធ្វើក៏ពិតមែន ប៉ុន្តែបណ្ដាប្រទេសជឿនលឿន អាចនឹងមិនរារែកចំពោះបច្ចេកវិទ្យាមនុស្សយន្តឡើយ ដោយសារត្រូវបានបំពាក់បច្ចេកវិទ្យាទំនើប ហើយអាចបំពេញកិច្ចការជំនួសមនុស្ស ពោរពេញដោយសមត្ថភាព។ លើសពីនេះ ក៏មានរ៉ូបូតមួយចំនួន ត្រូវបានផលិតជាពិសេស សម្រាប់បម្រើដល់វិស័យសំខាន់ៗ ទាំងវិស័យវេជ្ជសាស្ត្រ និងវិស័យយោធា។ កិច្ចការដែលមនុស្សមិនអាចធ្វើបានមួយចំនួន តែរ៉ូបូតអាចធ្វើបាន ជាក់ស្ដែងដូចជាមនុស្សយន្តដែលប្រើសម្រាប់ចូលទៅទីតាំងមានគម្រោះថ្នាក់ ដើម្បីពន្លត់អគ្គីភ័យ៕
