ប្រទេសប៉ាគីស្ថានលើកលែងការហាមប្រាមបណ្ដាញ YouTube ហើយ បន្ទាប់ពីបានបិទកាលពីឆ្នាំ២០១៣
ត្រឡប់ទៅកាលពីឆ្នាំ២០១៣ កន្លងទៅ បណ្ដាញ YouTube ត្រូវបានហាមឃាត់មិនឱ្យប្រជាជនប៉ាគីស្ថានអាចបើកទស្សនាបាន ប៉ុន្តែពេលនេះ រដ្ឋាភិបាលប៉ាគីស្ថានបានសម្រេចចិត្តដកចោលបម្រាមទៅលើគេហទំព័រចែកចាយវីដេអូខ្នាតយក្សលើលោកនេះហើយ។
ពេលនេះ ក្រុមហ៊ុន Google បានសហការជាមួយរដ្ឋាភិបាលប្រទេសប៉ាគីស្ថាន ដើម្បីនាំយកសេវាកម្ម YouTube មកបម្រើដល់ប្រជាជនក្នុងប្រទេសវិញ។ ការសហការគ្នានេះ បាននាំមកនូវវែបសាយ YouTube ដែលជាជំនាន់បង្កើតសម្រាប់ប្រើក្នុងតំបន់ (ក្នុងប្រទេសប៉ាគីស្ថាន)។ វែបសាយ Youtube ថ្មីសម្រាប់បើកមើលក្នុងប្រទេសប៉ាគីស្ថាន បានភ្ជាប់មកជាមួយការគាំទ្រភាសាប៉ាគីស្ថានផ្ទាល់ និងមានទំព័រដើម (homepage) បញ្ជាក់អំពីប្រទេសជាក់លាក់។
អ្នកនាំពាក្យរបស់ក្រុមហ៊ុន YouTube បានថ្លែងថា៖ «យើងមានសេចក្ដីរីករាយ ដែល YouTube ពេលនេះអាចដំណើរការបាននៅក្នុងប្រទេសប៉ាគីស្ថានវិញ។ ដូច្នេះប្រជាជនក្នុងប្រទេស នឹងអាចរីករាយទស្សនា ក៏ដូចជាចែកចាយវីដេអូ ផ្ដល់ជាបទពិសោធន៍ និងអត្ថប្រយោជន៍ សម្រាប់សហគមន៍អនឡាញទូទាំងពិភពលោក»។
សូមបញ្ជាក់ថា YouTube ត្រូវបានបិទចោលក្នុងប្រទេសប៉ាគីស្ថាន ចាប់តាំងពីឆ្នាំ២០១៣ ដោយសារមានការបង្ហោះវីដេអូពាក់ព័ន្ធនឹងការប្រមាទមើលងាយទៅលើប្រជាជនម៉ូស្លីម។ បន្ទាប់ពីនោះ តុលាការអាមេរិក បានបញ្ជាឱ្យក្រុមហ៊ុន Google លុបចោលវីដេអូនោះចេញពីវែបសាយ YouTube ប៉ុន្តែ Google បដិសេធ មិនធ្វើតាម៕
