បច្ចេកវិទ្យាមានការអភិវឌ្ឍតាមដំណាក់កាលផ្សេងៗគ្នា ជាក់ស្ដែងការពេញចិត្តទៅនឹងបច្ចេកវិទ្យាស្មាតហ្វូនដែលមានក្នុងរយៈពេលកាលពី ១០ឆ្នាំមុនគឺមួយបែប ទំនើបខ្លាំងបើគេយកវាទៅប្រៀបធៀប នឹងឆ្នាំចាស់ជាង។ នៅអំឡុងឆ្នាំនោះ ស្មាតហ្វូនដែលចាត់ចូលជាទូរស័ព្ទទំនើប និងមើលធ្ងន់គឺនៅលើ កូល័រ អេក្រង់ធំ កាមេរ៉ាថតច្បាស់ និងអាចដាក់កម្មវិធីទំនើបៗបាន។
ចុះប្រិយមិត្តដឹងទេថា តើរយៈពេល ១០ឆ្នាំមុន ស្មាតហ្វូនម៉ាកអ្វីខ្លះដែលធ្លាប់ស្ថិតក្នុងក្រអៅបេះដូងរបស់អ្នកប្រើប្រាស់ ជាស្មាតហ្វូនអស្ចារ្យជាងគេនោះ? បើចង់ដឹង សាកមកផ្ទៀង ៦គ្រឿងខាងក្រោមមើល៍ តើមានមួយណាធ្លាប់ស្ថិតក្នុងចិត្តរបស់អ្នកដែរឬទេ?
១) BlakBerry Pearl 8100
ទូរស័ព្ទរបស់ក្រុមហ៊ុនកាណាដានេះ ប្រើ QWERTY keyboard ជាក្ដារចុចអក្សរធំទូលាយ ងាយស្រួលវាយអក្សររហ័ស។ អេក្រង់ Pearl 8100 ទំហំ ២,២អ៊ីញមិនមាន touchscreen ហើយមាន resolution ទំហំ 240x260px។ កាមេរ៉ារបស់វា ទំហំ 1.3MP ភ្ជាប់ភ្លើង LED flash ហើយមានកម្មវិធីបើកចម្រៀង media player និងអាចបន្ថែម microSD បាន។ យ៉ាងណា Perarl 8100 គ្មាន 3G, WiFi ឬ GPS អីទេ។ ទូរស័ព្ទនេះ បានចេញលក់នៅអំឡុងខែកញ្ញា ឆ្នាំ២០១៦។
២) HTC TyTN
ជាទូរស័ព្ទប្រើ Windows Mobile ដែលសាធារណជនបានចោលក្រសែតភ្នែកមើលជាច្រើន កាលពីឆ្នាំ២០០៦។ វាដំណើរការដោយ Windows Mobile Professional 5.0 ដូច្នេះគេអាចប្រើកម្មវិធីដូចជា Microsoft Word Mobile, Microsoft Excel, DirectPush email និងកម្មវិធី Internet Explorer ជាដើម។
TyTN ជាទូរស័ព្ទរុញ និងមាន QWERTY keyboard ហើយក៏មានបណ្ដាញ 3G, Wi-Fi អេក្រង់ ២,៨អ៊ីញ ប្រភេទ touchscreen អមដោយ resolution ទំហំ 240x320px និងមានប៊ិចងាយស្រួលអូស វាសសរសេរអក្សរថែមទៀត។ អាចនិយាយបានថា វាជា Pocket PC ទៅហើយព្រោះប្រព័ន្ធប្រតិបត្តិការរបស់វា ជាប្រឡាយកាត់នឹង Windows OS សម្រាប់កុំព្យូទ័រ។
៣) Motorola Q
ងាកមកមើលទូរស័ព្ទរបស់ Motorola នេះវិញ គឺចាប់ផ្ដើមវាយលុកទីផ្សារខ្លាំងនៅពាក់កណ្ដាលឆ្នាំ២០១៦។ វាត្រូវបានឌីហ្សាញរូបរាងឡើងដើម្បីប្រកួតប្រជែងនឹងស្មាតហ្វូនក្រុមហ៊ុន BlackBerry។ Motorola Q មាន QWERTY keyboard អមដោយអេក្រង់ ២,៤អ៊ីញ resolution ទំហំ 320x240px តែគ្មាន touchscreen ទេ។ កាមេរ៉ាទូរស័ព្ទនេះ មានទំហំ 1.3MP និងអាចបន្ថែម microSD បាន។ យ៉ាងណាវា គ្មាន Wi-Fi, GPS និងសូម្បីតែ 3G លើកលែងតែម៉ូដែល CDMA ទើបមាន។
៤) Nokia N93
នរណាមិនស្គាល់ N93 ដែលមានឈ្មោះល្បីល្បាញលើទីផ្សារទូរស័ព្ទទំនើបនោះ។ N93 មានវត្តមានលើទីផ្សារក្នុងខែកក្កដា ឆ្នាំ២០០៦ ជាស្មាតហ្វូនខ្លាំងត្រង់កាមេរ៉ា។ N93 មានកាមេរ៉ា 3.2MP បច្ចេកវិទ្យា Carl Zeiss ជាមួយ 3x optical zoom, autofocus និងមានអេក្រង់ ២,៤អ៊ីញជាមួយ resolution ទំហំ 240x320px, ហើយអេក្រង់តូចពីមុខមាន 128x36px។ ទូរស័ព្ទនេះមាន 3G, Wi-Fi និងគាំទ្រកម្មវិធី Adobe Flash Lite ភ្ជាប់មកជាស្រេច ប៉ុន្តែគ្មាន GPS។ វាប្រើប្រព័ន្ធ Symbian OS 9.1 (S60 3rd edition)។
៥) Palm Treo 680
ជាស្មាតហ្វូនដំបូងរបស់ក្រុមហ៊ុន Palm ម៉ូដែល Tero 680 ដែលត្រូវបានបង្កប់អង់តែនបាត់មើលមិនឃើញក្នុងទូរស័ព្ទ។ វាជាស្មាតហ្វូនដែលមានការផ្លាស់ប្ដូរធំរបស់ក្រុមហ៊ុន។ ទូរស័ព្ទនេះដើរដោយ Palm OS ហើយមាន QWERTY Keyboard និងមានអេក្រង់ touchscreen ទំហំ ២,៥អ៊ីញ resolution 320x320px។ Treo 680 គ្មាន WiFi និង 3G ទេ តែក៏ទទួលបានការគាំទ្រខ្លាំងនៅលើទីផ្សារផងដែរ ព្រោះជាស្មាតហ្វូនជំនាញសម្រាប់ការផ្ញើអ៊ីមែល ការបើកវែបសាយ និងការវាយអក្សរផ្សេងៗ។
៦) Sony Ericsson W950
ចុងក្រោយជាទូរស័ព្ទទំនើបរបស់ Sony Ericsson ម៉ូដែល W950។ វាជាទូរស័ព្ទ 3G ដើរដោយ Symbian UIQ ភ្ជាប់អេក្រង់ ២,៦អ៊ីញ, 240x320px touchscreen និងមានរូបរាងស្អាត sylus។ ស្មាតហ្វូនក្រុមហ៊ុនជប៉ុននេះ មានប៊ូតុងច្រើនបន្តិច ងាយស្រួលក្នុងការគ្រប់គ្រងកម្មវិធីផ្សេងៗ ក៏ដូចជា Walkman music player និងវិទ្យា Stereo FM។ W950 មានមេម៉ូរី 4GB៕
