Microsoft ចេញលក់ Surface Book 1TB, Surface Pro 4, និងប៊ិចមាស Surface Pen ហើយ
ក្រុមហ៊ុន Microsoft នៅសប្ដាហ៍នេះ បានប្រកាសចេញនូវជម្រើសអាប់ក្រេក hardware លើថេប្លេតកុំព្យូទ័រ Surface របស់ខ្លួន ដែលក្នុងនោះមានលក្ខណៈសម្បត្តិ អង្គផ្ទុកទិន្នន័យទំហំ 1TB អង្គប្រតិបត្តិ Core i7 សម្រាប់កុំព្យូទ័រ Surface Book និង Surface 4 ក៏ដូចជាចេញលក់ប៊ិចមាស Gold Surface Pen ដំណាលគ្នាផងដែរ។
Surface Pro 4
ការបន្ថែមលក្ខណៈ សម្បត្តិ Hardware ចុងក្រោយលើ Surface នឹងធ្វើឱ្យវាដំណើរការប្រកបដោយសមត្ថភាពខ្ពស់។ ក្រុមហ៊ុនបានចេញលក់ Surface ទាំងពីរម៉ូដែល និងប៊ិចមាស Surface Pen នៅលើទីផ្សារអាមេរិក និងកាណាដា។ ទាំងកុំព្យូទ័រ Surface Book និងថេប្លេត Surface Pro 4 សុទ្ធតែត្រូវបានបំពាក់អង្គប្រតិបត្តិជំនាន់ចុងក្រោយគឺទី៦ របស់ក្រុមហ៊ុន Intel ប្រភេទ Core i7 ដែលគាំទ្រ RAM ដល់ 16GB។ ពេលនេះក្រុមហ៊ុនបានដាក់លក់ផលិតផលទាំង ៣មុខនេះនៅលើ Store អនឡាញរបស់ខ្លួនផ្ទាល់ និងបណ្ដាអ្នកលក់រាយដទៃទៀត។ Surface Pro 4 បំពាក់អង្គផ្ទុកទិន្នន័យ 1TB ថ្មីនឹងមានតម្លៃ ២៦៩៩ដុល្លារអាមេរិក និងអមដោយលក្ខណៈ សម្បត្តិថ្មីលើផ្នែកផ្សេងៗមួយចំនួនទៀត។ ចំណែក Microsoft Surface Book នឹងលក់ក្នុងតម្លៃចាប់ពី ១៤៩៩ដុល្លារ អមដោយអង្គផ្ទុកទិន្នន័យថ្មី 1TB ដូចគ្នា។ Surface Book គឺជាឡេបថបដំបូងដែលមានសមត្ថភាពខ្ពស់របស់ ក្រុមហ៊ុន Microsoft មានទម្ងន់ ១៥១៦ក្រាម ភ្ជាប់អេក្រង់ទំហំ ១៣,៥អ៊ីញ PixelSense ជាមួយ resolution ទំហំដល់ (3000x2000)px ដែលធន់នឹងការចាំងប៉ះពន្លឺ ពោលគឺនៅតែធ្វើឱ្យការបង្ហាញរូបមានលក្ខណៈច្បាស់ និងដិតល្អ។
ប៊ិចមាស Surface Pen
ចំណែកប៊ិចពណ៌មាស Surface Pen វិញនឹងមានលក់នៅតាមបណ្ដាទីផ្សារក្នុងប្រទេសមួយចំនួនដូចជា៖ កាណាដា, ដាណឺម៉ាក, ហ្វាំងឡង់, អ៊ីតាលី, ន័រវែស, ប៉ូឡូញ, ព័រទុយហ្គាល់, អេស្ប៉ាញ, ស៊ុយអែត និងសហរដ្ឋអាមេរិក ដែលតម្លៃរបស់វាគឺ ៦០ដុល្លារ។ ប៊ិច Surface Pen គាំទ្រប្រើជាមួយ Surface 3, Surface Pro 3, Surface Pro 4 និង Surface Book៕
