Samsung នឹងធ្វើពិធីសម្ពោធកំពូលស្មាតហ្វូន Galaxy S7 របស់ខ្លួននៅ ៣សប្ដាហ៍ខាងមុខនេះហើយ
Samsung ពេលនេះបានអះអាងជាសាធារណៈហើយថា ក្រុមហ៊ុននឹងប្រារព្ធព្រឹត្តិការណ៍ “Unpacked” ចុងក្រោយមួយ នៅរយៈពេលប្រហែល ៣សប្ដាហ៍ខាងមុខនេះ អមដោយឃ្លាបញ្ជាក់ #TheNextGalaxy។ ក្រុមហ៊ុនថែមទាំងបានបញ្ចេញវីដេអូខ្លីរយៈពេល ១៤វិនាទី ដែលហាក់ចង់បង្ហើបអំពីវត្តមាន Galaxy S7 ប្រាកដជានឹងត្រូវវែកមុខក្នុងព្រឹត្តិការណ៍ថ្ងៃទី២១ កុម្ភៈ ខាងមុខ។
https://youtu.be/3g3O94WALV8
ព្រឹត្តិការណ៍ Unpacked នឹងត្រូវក្រុមហ៊ុន Samsung ធ្វើឡើងចំថ្ងៃអាទិត្យទី២១ កុម្ភៈ នៅក្នុងទីក្រុង Barcelona មុនសមាជពិភពលោក Mobile World Congress ១ថ្ងៃ។ ក្រុមហ៊ុនបានបង្ហាញទម្រង់ការអញ្ជើញអមដោយរូបស្រមោលគូបដែលមានគែមភ្លឺ ២ជ្រុងហាក់បង្ហាញរាងជាលេខ៧ សំដៅលើ Galaxy S7។
ជារូប render ត្រូវគេអះអាងថាជា Galaxy S7
ព័ត៌មានផ្សេងៗកន្លងមក បានធ្វើការសន្និដ្ឋានថា Galaxy S7 នឹងមានរូបរាងឌីហ្សាញស្រដៀង Galaxy S6 និង S6 Edge ប៉ុន្តែស្មាតហ្វូនជំនាន់ថ្មីនេះ នឹងអាចឱ្យគេបន្ថែមកាត microSD បាន ព្រមទាំងមានរន្ធ USB-C, មានបច្ចេកវិទ្យាមិនចូលទឹក, ផ្ដល់ជម្រើសទំហំផ្សេងគ្នា។ ម៉ូដែលខ្លះនឹងបំពាក់ឈីបថ្មី Snapdragon 820 របស់ Qualcomm។ បើតាមរបាយការណ៍ BizKhmer ទទួលបានកន្លងទៅថា Samsung មានគម្រោងផលិត Galaxy S7 ចំនួន ៥លានគ្រឿងនៅដំណាក់កាលដំបូង ចែកជាពីរទំហំអេក្រង់ផ្សេងគ្នា។ ក្នុងនោះ Galaxy S7 ដែលមានអេក្រង់រាបស្មើ នឹងផលិត ៣,៣លានគ្រឿង ចំណែក Galaxy S7 Edge ចំនួន ១,៦លានគ្រឿង។ Galaxy S7 នឹងមានអេក្រង់ ៥,២អ៊ីញ ចំណែក 7 Edge នឹងមានអេក្រង់ ៥,៥អ៊ីញ៕ ... Samsung គ្រោងផលិត Galaxy S7 ចំនួន ៥លានគ្រឿងនៅដំណាក់កាលដំបូង ចែកជាពីរទំហំអេក្រង់ផ្សេងគ្នា ...
