Gmail ដែលជាសេវាកម្មផ្ញើអ៊ីមែលរបស់ក្រុមហ៊ុន Google ចាប់តាំងពីបានបង្កើតនៅថ្ងៃទី១ ខែមេសា ឆ្នាំ២០១៤ មកដល់ពេលនេះ មានអ្នកប្រើប្រាស់រហូតដល់ ១ពាន់លាននាក់ហើយ។ យោងតាមសំដីនាយកប្រតិបត្តិលោក Sundar Pichai អំឡុងពេលប្រកាសរបាយការណ៍ប្រាក់ចំណូលត្រីមាសទី៤ ឆ្នាំ២០១៥ ឱ្យដឹងថា តួលេខអ្នកប្រើសេវាកម្ម Gmail មានប្រមាណ ១ពាន់លាននាក់ដែលកំពុងប្រើប្រាស់រៀងរាល់ខែ។
តួលេខអ្នកប្រើមានការកើនឡើងពីខែ ឧសភា ឆ្នាំ២០១៥ កន្លងទៅដែលពេលនោះមានចំនួនអ្នកប្រើតែ ៩០០លាននាក់ប៉ុណ្ណោះ។ នេះគឺជាសេវាកម្មដែលមានអ្នកប្រើខ្ទង់ពាន់លាននាក់ទី៧ហើយ របស់ក្រុមហ៊ុន Google បន្ទាប់ពីសេវាកម្ម៖ Search, Chrome, Android, Google Play, Maps និង YouTube។
រីឯមុខងារ Smart Replies ដែលក្រុមហ៊ុន Google បានបញ្ចេញឱ្យប្រើកាលពីឆ្នាំទៅ ក៏បានជួយសម្រួលដល់ការប្រើប្រាស់សេវាកម្មនេះ ងាយស្រួលឆ្លើយតបអ៊ីមែលដែលលោតចូលមកបានរហ័ស លក្ខណៈខ្លីៗ។ មុខងារនេះ ត្រូវបានឌីហ្សាញឡើងដើម្បីងាយស្រួលឆ្លើយតបអ៊ីមែលនៅលើឧបករណ៍ចល័ត (mobile device)។ គណនីប្រមាណ ១០% ហើយដែលបានទទួលយកបទពិសោធន៍ថ្មីពីមុខងារឆ្លើយតបខ្លីៗបានរហ័សនេះ៕
