សេចក្ដីរាយការណ៍មួយពីកាសែត Guardian ក្នុងសប្ដាហ៍នេះឱ្យដឹងមកថា ក្រុមហ៊ុន Google បច្ចុប្បន្នកំពុងដំណើរការស្ងាត់ៗលើគម្រោងអភិវឌ្ឍប្រព័ន្ធបណ្ដាញអ៊ីនធឺណិត 5G ចែកចាយដោយយន្តហោះគ្មានមនុស្សបើក ដែលឱ្យឈ្មោះថា គម្រោង Skybender។
ក្រុមហ៊ុន Google កំពុងធ្វើតេស្តយន្តហោះដ្រូនដើរដោយថាមពលពន្លឺព្រះអាទិត្យ ឬថាមពលសូឡា នៅដែនអាកាសក្នុងរដ្ឋ New Mexico នៃសហរដ្ឋអាមេរិក។ ដ្រូននឹងដើរតួយ៉ាងសំខាន់ ជាអ្នកចែកចាយតំណភ្ជាប់អ៊ីនធឺណិតកម្រិត 5G ដែលមានល្បឿនលឿនជាងបណ្ដាញ 4G នៅលើឧបករណ៍អេឡិចត្រូនិកចល័តសព្វថ្ងៃដល់ទៅ ៤០ដង។
កាសែត Guardian បានរាយការណ៍នៅលើវែបសាយខ្លួនថា ជាបណ្ដោះអាសន្ននេះ Google ប្រើដ្រូនឱ្យហោះក្នុងរយៈចម្ងាយ ១៥០០០ហ្វីតបួនជ្រុង ដើម្បីជាការធ្វើតេស្តសាកល្បង។ ដ្រូនក្នុងគម្រោងចែកចាយអ៊ីនធឺណិត 5G គឺដោយបានការឌីហ្សាញឡើងដោយវិស្វករ Richard Foster នៅក្រុមហ៊ុន Virgin Galactic។ ខណៈដែលកំពុងធ្វើតេស្តដ្រូនសម្រាប់គម្រោង Skybender នោះ ក្រុមហ៊ុន Google ថែមទាំងកំពុងធ្វើតេស្តយន្តហោះសាកល្បងរបស់ខ្លួនដែលមានឈ្មោះ Centaur៕
