បើដូចទៅនឹងពាក្យចចាមអារ៉ាមមែននោះ កំពូលទូរស័ព្ទ iPhone 7 ដែលចេញឆ្នាំនេះនឹងពិសេស ប្ដូរប្រវត្តិសាស្ត្រក្នុងត្រកូល iPhone របស់ Apple មិនខាន។ តាមរបាយការណ៍ថ្មីមួយឱ្យដឹងថា Apple ពេលនេះ អាចកំពុងទាក់ទងជាមួយក្រុមហ៊ុនផ្គត់ផ្គង់កាមេរ៉ា ដើម្បីនាំយកកាមេរ៉ា dual lens ទៅបំពាក់នៅលើ iPhone 7 Plus។ ដៃគូផ្គត់ផ្គង់ទាំងនោះ ត្រូវគេរាយការណ៍ថា ជាក្រុមហ៊ុនចិន និងជប៉ុន ហើយក្រុមហ៊ុន Largan Technology របស់តៃវ៉ាន់ក៏បានផ្ញើគំរូកាមេរ៉ាទៅដល់ Apple សម្រាប់ធ្វើតេស្តហើយដែរ។
នៅខណៈពេលនេះ Largan គឺជាក្រុមហ៊ុនផ្គត់ផ្គង់កាមេរ៉ាធំមួយរបស់ Apple ដែលបានផ្គត់ផ្គង់ប្រមាណ ៦០% នៃកាមេរ៉ាដែលប្រើនៅលើទូរស័ព្ទ iPhone និង iPad។ បើតាមរបាយការណ៍នេះ មានន័យថា ក្រុមហ៊ុន Apple នឹងបន្តស្វែងរកដៃគូបន្ថែមសម្រាប់ការផ្គត់ផ្គង់ចំនួនច្រើន និងប្រភេទកាមេរ៉ា dual lens សម្រាប់បំពាក់នៅលើ iPhone ជំនាន់ទី១០។
មូលហេតុដែល Apple នឹងស្វែងរកដៃគូផ្គត់ផ្គង់ច្រើនក្រុមហ៊ុនដើម្បីនាំយកកាមេរ៉ាប្រភេទ dual lens ទៅបំពាក់លើទូរស័ព្ទ iPhone 7 Plus គឺដើម្បីបន្ថយហានិភ័យឱ្យនៅត្រឹមកម្រិតទាបជាអប្បបរមា ទាំងគុណភាព និងបរិមាណផ្គត់ផ្គង់។
ទូរស័ព្ទ iPhone ជំនាន់ថ្មីរបស់ Apple ត្រូវគេរំពឹងថា នឹងទទួលបច្ចុប្បន្នភាពថ្មី ដោយបន្ថែមទំហំ RAM, អង្គប្រតិបត្តិល្បឿនលឿនជាងមុន ដែលអាចប្រើឈីប Apple A10។ យើងអាចរំពឹងថា Apple ក៏នឹងធ្វើបច្ចុប្បន្នភាពទៅលើអេក្រង់សម្រាប់ iPhone ចេញឆ្នាំនេះផងដែរ។ iPhone 7 នឹងមានកម្រិត resolution យ៉ាងហោច 1080p ចំណែក 7 Plus មានកម្រិតដល់ Quad HD។
Apple ក៏នឹងធ្វើបច្ចុប្បន្នលើសូហ្វ៊ែរដោយដាក់ឱ្យដំណើរការជាមួយ iOS 10 ថែមទៀត។ iPhone 7 និង 7 Plus ត្រូវគេរំពឹងថា នឹងត្រូវក្រុមហ៊ុនវែកមុខនៅខែកញ្ញាខាងមុខ ខណៈបច្ចុប្បន្នមានរបាយការណ៍មកថា នឹងមាន iPhone 5SE អេក្រង់ ៤អ៊ីញចេញមុន ដែលនឹងឃើញពន្លឺថ្ងៃនៅខែមីនាក្រោយនេះ៕
