ប្រយ័ត្នយំលែងចេញ បើហ៊ានតែចូលជាង ប្ដូរប៊ូតុង Touch ID ផ្ដេសផ្ដាស iPhone របស់អ្នកនឹងក្លាយជាដុំថ្មឥតបានការ
អ្នកប្រើ iPhone រាប់ពាន់នាក់ ធ្លាប់មានបទពិសោធន៍ជូរចត់ ដោយក្រោយពីយកទៅជួសជុលប៊ូតុង Home ធ្វើឡើងក្រៅពីអ្នកបច្ចេកទេសរបស់ Apple ពោលគឺនៅតាមហាងជួសជុលផ្សេងៗហើយ វាដំណើរការលែងបាន ក្លាយទៅជាដុំថ្មីឥតប្រយោជន៍មួយ។ ចំណែកបញ្ហាដែលគេស្គាល់ជា “Error 53” នេះវិញ ត្រូវគេហទំព័រ Guardian ឱ្យដឹងម្សិលមិញថា នឹងកើតមានលើទូរស័ព្ទ iPhone 6, 6 Plus, 6S និង 6S Plus។
បញ្ហាគឺនៅពេលអ្នកយកទូរស័ព្ទទំនើប ៤ម៉ូដែលខាងលើទៅជួសជុលប៊ូតុង Home នៅតាមហាងជួសជុល ដែលពុំមែនជាអ្នកជំនាញនៅ Apple Store ។ប្រសិនអ្នកប្ដូរប៊ូតុង Home ដែលភ្ជាប់ Touch ID sensor មិនបានត្រឹមត្រូវ វានឹងធ្វើឱ្យទឹកភ្នែកនិយាយលែងចេញ ព្រោះ ទូរស័ព្ទនឹងក្លាយជារបស់ឥតបានការ។ បញ្ហានេះត្រូវគេហៅឈ្មោះថា “Error 53” នៅលើទូរស័ព្ទរបស់អ្នក។
តើអ្វីជា Error 53? វាគឺជាដំណើរខុសបច្ចេកទេសឬ error មួយដែលប្រែក្លាយទូរស័ព្ទ iPhone ទៅជាដុំថ្មប្រើលែងបាន។ ចុះតើហេតុអ្វី? វាគឺប្រាកដដោយសារមកពីបញ្ហា Touch ID sensor នៅលើទូរស័ព្ទរបស់អ្នកតែម្ដង។
តើមានអ្វីកើតឡើង?
រាល់ Touch ID sensor នីមួយៗ ត្រូវបានបំពាក់ជាមួយទូរស័ព្ទ iPhone មួយជាក់លាក់ ហើយវានឹងមិនដំណើរការជាមួយទូរស័ព្ទ iPhone ដទៃបានឡើយ។ វិធីសាស្ត្រនេះត្រូវ Apple គិតឡើងដើម្បី ផ្ដល់សុវត្ថិភាពកម្រិតខ្ពស់លើធាតុនៃឈីប ដែលទិន្នន័យ Touch ID ត្រូវបានរក្សា ហើយមិនអាចយកទៅប្រើជាមួយ Hardware ដទៃឡើយ។ មានន័យថា ទោះបីអ្នកយកប៊ូតុង Home លើទូរស័ព្ទអ្នកទៅ ដាក់នៅលើ iPhone ផ្សេង វានឹងមិនដំណើរការឡើយ រាល់ព័ត៌មាន និងការចងសក្ដានុពលគ្រាប់ចុច (keys potential) ទៅលើប៊ូតុងនោះ នឹងមិនអាចធ្វើការភ្ជាប់ប្រើនៅលើទីតាំងផ្សេងក្រៅពី hardware ដែលបានដំឡើងជាកំផ្លេពីរោងចក្របានទេ៕
