Laptop របស់​ក្រុមហ៊ុន Apple ពិត​ជា​ត្រូវ​បាន​ឌីហ្សាញ​រូបរាង​ល្អ​ប្រណិត ត្រូវ​ចិត្ត​ចំពោះ​យុវវ័យ​សម័យ​បច្ចេកវិទ្យា​បច្ចុប្បន្ន។ នេះ​មិន​ទាន់​និយាយ​ដល់​លក្ខណៈ សម្បត្តិ​នៅ​ឡើយ​ផង។ ក្រុមហ៊ុន​អាមេរិក​នេះ​បាន​អភិវឌ្ឍ​ស៊េរី​កុំព្យូទ័រ​យួរដៃ MacBook ​ពី​មួយ​ជំនាន់​ទៅ​មួយ​ជំនាន់​រឹតតែ​ទំនើប ពោរពេញ​ដោយ​លក្ខណៈ​សម្បត្តិ​ពិសេស ជាក់ស្ដែង​អេក្រង់ Retina ផ្ដល់​រូបភាព​ច្បាស់​ត្រជាក់​ភ្នែក​ជា​ដើម។ https://youtu.be/najkwVpShZ8 បើ​និយាយ​ពី MacBook រាង​ស្ដើង​វិញ ពុំ​សូវ​មាន Laptop ​ណា​អាច​ប្រជែង MacBook Air នៅ​ឡើយ។ យ៉ាងណា បច្ចុប្បន្ន​ក្រុមហ៊ុន​កុំព្យូទ័រ​មួយ​ចំនួន​បាន សិក្សា​ពី​តម្រូវការ​ទីផ្សារ អ្នក​ប្រើ​ចូលចិត្ត​កុំព្យូទ័រ​ស្រាលៗ កម្រាស់​ស្ដើង ដើម្បី​ងាយស្រួល​យក​តាម​ខ្លួន។ ជាក់ស្ដែង​ក្រុមហ៊ុន Lenovo ក៏​បាន​បញ្ចេញ​លក់​កុំព្យូទ័រ Yoga 3 Pro នៅ​លើ​ទីផ្សារ​ហើយ​ដែរ ដើម្បី​ប្រកួតប្រជែង​នឹង​កុំព្យូទ័រ MacBook Air របស់ Apple។ តើ Yoga 3 មាន​លក្ខណៈ​ពិសេស​អស្ចារ្យ​យ៉ាងណា ទើប​ហ៊ាន​មក​តតាំង​ជាមួយ MacBook Air? តាមរយៈ​វីដេអូ​ខាង​ក្រោម លោក​អ្នក​នឹង​អាច​វាយតម្លៃ​ឃើញ​នូវ​គុណសម្បត្តិ​រវាង Laptop ទាំង​ពីរ​ម៉ូដែល៖ នៅ​ក្នុង​វីដេអូ​ខាង​លើ កុំព្យូទ័រ MacBook Air និង Yoga 3 Pro ត្រូវ​បាន​យក​មក​ប្រៀបធៀប​លក្ខណៈ សម្បត្តិ​សំខាន់ៗ​ប៉ុន្មាន​ចំណុច​ដូច​ជា៖ -MacBook Air មាន​កម្រាស់ ១៧មិល្លីម៉ែត្រ ខណៈ ដែល Yoga 3 Pro មាន​កម្រាស់​ស្ដើង​ជាង ពោល​គឺ​មាន​កម្រាស់​ត្រឹមតែ ១៣មិល្លីម៉ែត្រ -Yoga 3 Pro ត្រូវ​បាន​រចនា​ជា​កុំព្យូទ័រ Hybrid ពោល​គឺ​មាន​អេក្រង់​អាច​បត់​ថយ​ក្រោយ ធ្វើ​ជា​ថេប្លេត​បាន ចំណែក MacBook Air មិន​អាច​ធ្វើ​ដូច។ ដោយសារ​តែ​បែប​នេះ Yoga 3 Pro អាច​ឱ្យ​គេ​បញ្ឈរ​ងាយស្រួល​ទស្សនា​វីដេអូ​បាន។ -Yoga 3 Pro គឺ​ជា Laptop មាន​អេក្រង់​បញ្ជា​ដោយ touchscreen ​ខណៈ​ដែល MacBook Air ​គ្មាន។ ដូច្នេះ​តាមរយៈ​លក្ខណៈ​សម្បត្តិ​ធំៗ​ទាំង​៣ ខាង​លើ ធ្វើឲ្យ​អាច​វាយ​តម្លៃ​បាន​ថា កុំព្យូទ័រ Yoga 3 Pro របស់ Lenovo ជាប់​ជា Laptop ល្អ​ជាង MacBook Air៕ ចុះ​ប្រិយមិត្ត​វិញ តើ​យល់​យ៉ាងណា​ដែរ? ដោយ៖ រឹទ្ធិរាជ ប្រភព៖ Youtube