iPad Pro អេក្រង់ ១២,៩អ៊ីញនឹងចេញលក់លើទីផ្សារថ្ងៃទី១១ ខែវិច្ឆិកាចាប់ពី ៧៩៩ដុល្លារ
ក្រុមហ៊ុន Apple បានបើកពិធីសម្ពោធ iPad Pro ក្នុងព្រឹត្តិការណ៍កាលពីដើមខែកញ្ញា ប៉ុន្តែមិនបានបញ្ជាក់កាលបរិច្ឆេទចេញលក់ថេប្លេតអេក្រង់ធំមិនធ្លាប់មានពីមុនរបស់ខ្លួន លើទីផ្សារនោះទេ គ្រាន់តែបង្ហើបឱ្យដឹងថា នឹងមានលក់់លើទីផ្សារមួយចំនូនអំឡុងខែវិច្ឆិកា។ ចំណែករបាយការណ៍ពេលនេះ អះអាងថា iPad Pro អេក្រង់ ១២,៩អ៊ីញនេះ នឹងបង្ហាញវត្តមាននៅតាមបណ្ដាហាងលក់ធំៗក្នុងសហរដ្ឋអាមេរិក ចាប់ពីថ្ងៃទី១១ វិច្ឆិកានេះហើយ។
ថេប្លេត iPad ស៊េរីថ្មីចេញឆ្នាំនេះ គឺពិតជាពិសេស ត្រូវបានពង្រីកអេក្រង់ និងប្រើឈ្មោះថាគឺ iPad Pro។ មិនតែប៉ុណ្ណោះ ត្រូវបានក្រុមហ៊ុនផលិតប៊ិចសម្រាប់ប្រើជាមួយ iPad អេក្រង់ ១២,៩អ៊ីញនេះ ដែលហៅថា Apple Pencil។ iPad Pro ថែមទាំងអាចប្រើបានជាមួយ Smart keyboard ងាយស្រួលសម្រាប់ការវាយអក្សរលើថេប្លេត។ យ៉ាងណា ឧបករណ៍បន្ថែមទាំងពីរមុខនេះ នឹងត្រូវគិតថ្លៃផ្សេងពីថេប្លេត។ ប៊ិច Apple Pencil តម្លៃ ៩៩ដុល្លារ ហើយ Smart Keyboard តម្លៃ ១៦៩ដុល្លារ នឹងចេញលក់ដំណាលគ្នានឹង iPad Pro ដែលមានតម្លៃ ៧៩៩ដុល្លារនៅថ្ងៃទី១១ វិច្ឆិកានេះ។
ថេប្លេត iPad Pro ត្រូវបានបំពាក់អង្គប្រតិបត្តិជំនាន់ថ្មីចុងក្រោយល្បឿនលឿន គឺ Apple A9X ហើយបង្កប់ដោយ speaker ចំនួន៤ ផ្ដល់សំឡេងឮខ្លាំង និងពីរោះ។ លក្ខណៈសម្បត្តិ iPad Pro រួមមាន៖ -អេក្រង់ទំហំ ១២,៩អ៊ីញប្រភេទ LED-backlit IPS LCD មាន resolution 2048x2739px និងមានដង់ស៊ីតេភិចហ្សែល 265ppi -កាមេរ៉ាទំហំ 8MP ថតរូបកម្រិត 3264x2448px និងវីដេអូកម្រិត 1080p@30fps, 720p@120fps -បច្ចេកវិទ្យាកាមេរ៉ា៖ geo-tagging, face/smile detection, photo/panorama -កាមេរ៉ាមុខទំហំ 1.2MP ថតវីដេអូកម្រិត 720p@30fps, អមដោយមុខងារ face detection, HDR, FaceTime over Wi-Fi ឬ Cellular
-ឈីបអង្គប្រតិបត្តិ Apple A9X ល្បឿនលឿនជាងមុន -អង្គចងចាំ 32/128GB -តំណភ្ជាប់ Wi-Fi 802.11 a/b/g/n/ac, hotspot, Bluetooth v4.0, GPS, USB v2.0 -បច្ចេកវិទ្យាស្កេនក្រយៅដៃ (TouchID) -ប្រើស៊ីមកាតប្រភេទ Nano-Sim/Apple Sim (អាមេរិក និងអង់គ្លេស) -(បxទទ)=(៣០៥,៧មិល្លីម៉ែត្រ x ២២០,៦មិល្លីម៉ែត្រ) -កម្រាស់ = ៩,៦មិល្លីម៉ែត្រ -ទម្ងន់ ៧១៣ក្រាម (ម៉ូដែល Wi-Fi) និង ៧២៣ក្រាម (ម៉ូដែល LTE) -ថ្ម អាចប្រើសម្រាប់សន្ទនាបានរយៈពេល ១០ម៉ោង
iPad Pro នឹងចេញលក់ជាមួយជម្រើសពណ៌ចំនួន៣ គឺពណ៌ទឹកប្រាក់ ពណ៌មាស និងពណ៌ប្រផេះ ហើយតម្លៃរបស់វា ចាប់ពី ៧៩៩ដុល្លារឡើងទៅ ដែលនឹងចរាចរលើទីផ្សារចាប់ពីថ្ងៃទី១១ ខែវិច្ចិកានេះ៕
ប្រែសម្រួល៖ រឹទ្ធិរាជ
ប្រភព៖gsmarena
