​អ្នក​ប្រហែល​មិន​ធ្លាប់​ឮ​ច្រើន​ទាក់ទង​នឹង​ក្រុមហ៊ុន​ផលិត​ទូរស័ព្ទ​ចិន Oppo ​ប៉ុន្តែ​នៅ​អំឡុង​ព្រឹត្តិការណ៍ MWC ក្រុមហ៊ុន​នេះ​បាន​សន្យា​ចំពោះ​មុខ​សាធារណជន​ថា នឹង​នាំ​យក​បច្ចេកវិទ្យា​ទំនើប​អស្ចារ្យ​ចំនួន​ពីរ​ក្នុង​ឆ្នាំ២០១៦ នេះ។ នោះ​ជា​បច្ចេកវិទ្យា​សាកថ្ម​រហ័ស​នៅ​លើ​ទូរស័ព្ទ​ស្មាតហ្វូន ដែលOppo ​អះអាង​ថា ប្រើ​រយៈពេល​ត្រឹមតែ ១៥នាទី នឹង​អាច​សាក​ថ្ម​កម្រិត 2500mAh ពេញ។ ចំណែក​បច្ចេកវិទ្យា​មួយ​ទៀត គឺ​ពាក់ព័ន្ធ​នឹង​បច្ចេកវិទ្យា​ថតរូប ដែល​ក្រុមហ៊ុន​អះអាង​ថា កំពុង​ស្រាវជ្រាវ និង​អភិវឌ្ឍ។ វា​នឹង​ជួយ​ដល់​មុខងារ​ sensor ​សម្រាប់​ទប់​លំញ័រ​នៅ​ពេល​ថតរូប ធ្វើការ​គុណភាព​រូបថត​ច្បាស់ មិន​ងាយ​ព្រាល​ដោយ​ការ​ញ័រ​ដៃ។ នៅ​ក្នុង​ព្រឹត្តិការណ៍ MWC 2016 នេះ ក្រុមហ៊ុន​ទូរស័ព្ទ Oppo បាន​បង្ហាញ​ជូន​សាធារណជន​នូវ​បច្ចេកវិទ្យា​សាកថ្ម​ល្បឿន​លឿន​ ដោយ​ធ្វើតេស្ត​នៅ​លើ​ឧបករណ៍​ដែល​មាន​ថាមពល​ថ្ម 2500mAh អាច​សាកថ្ម​បាន ៨៥% ដោយ​ប្រើ​ពេល​ត្រឹមតែ ៧នាទី​ប៉ុណ្ណោះ។ ទម្រង់​នេះ​ត្រូវ​បាន​គេ​ឱ្យ​ឈ្មោះ​ថា Super VOOC ​ដែល​បច្ចុប្បន្ន​ស្ថិត​នៅ​ជា​គំរូ​បឋម (Prototype) ​កំពុង​ត្រូវ​បាន​ស្រាវជ្រាវ ​និង​អភិវឌ្ឍ។ សូម​បញ្ជាក់​ថា ក្រុមហ៊ុន Qualcomm ​ក៏​កំពុង​ស្រាវជ្រាវ​បច្ចេកវិទ្យា​សាកថ្ម​ចូល​លឿន Quick Charge 3.0 ​ដើម្បី​បំពាក់​លើ​ស្មាតហ្វូន​ស៊េរី​ក្រោយៗ​ផង​ដែរ។ បច្ចេកវិទ្យា​សាកថ្ម​នោះ​នឹង ​អាច​សាក​ទូរស័ព្ទ​ឡើង​បាន ៨០% ដោយ​ប្រើ​ពេល ៣៥នាទី។ យ៉ាងណា​រយៈពេល​នេះ គឺ​នៅតែ​យូរ​ជាង​បច្ចេកវិទ្យា​របស់ Oppo ដែល​បាន​អះអាង​នៅ​ឡើយ។ Oppo បាន​និយាយ​ថា ​ក្រុមហ៊ុន​នឹង​ប្រើ algorithm ​កម្លាំង​តង់ស្យុង​ទាប​សម្រាប់​សាក​ថ្ម ​ដែល​ជា​បច្ចេកវិទ្យា VOOC ហើយ​អាច​ថែទាំ​មិន​ឱ្យ​ឆាប់​ខូច​ថ្ម និង​រក្សា​សមត្ថភាព​ថ្ម​បាន​យូរ​អង្វែង​ថែមទៀត៕