​យោង​តាម​ការ​បញ្ជាក់​របស់​លោក Dong-jin ​ប្រធាន​ផ្នែក​ពាណិជ្ជកម្ម​របស់ Samsung ​បាន​ឱ្យ​ដឹង​ថា តួលេខ​បញ្ជា​ទិញ​ទូរស័ព្ទ Galaxy S7 និង S7 edge ​បាន​ធ្វើ​ឱ្យ​ក្រុមហ៊ុន​មាន​ការ​ភ្ញាក់ផ្អើល​ព្រោះ​ច្រើន​លើស​ការ​រំពឹង​ទុក​ទៅ​ទៀត។ ទូរស័ព្ទ​កំពូល​ស៊េរី​ថ្មី​ចុងក្រោយ​ទាំងពីរ​នេះ ចាប់​ផ្ដើម​មាន​លក់​នៅ​តាម​បណ្ដា​ទីផ្សារ​មួយ​ចំនួន​នៅ​ថ្ងៃ​នេះ​ហើយ ខណៈ​ដែល​អតិថិជន​បាន​បាន​កុម្ម៉ង់​ទិញ​មុន ព្រោះ​ទន្ទឹង​រង់ចាំ​ដើម្បី​ទទួល​យក​បទពិសោធន៍​ថ្មី​ជាមួយ​ស្មាតហ្វូន​ទំនើប​នេះ។ https://youtu.be/gH-XNZRN4J8 ថ្នាក់​ដឹកនាំ​របស់ Samsung ​រូប​នេះ​បាន​លើកឡើង​ថា ​ស្មាតហ្វូន Galaxy S7 ថ្មី​ទាំងពីរ​នេះ នឹង​ជួយ​ដល់​ការ​ច្បាម​យក​ចំណែកទីផ្សារ​ទូរស័ព្ទ​នៅ​ប្រទេស​ចិន​បាន​ខ្លះ​ឡើង​វិញ បន្ទាប់ពី​ថមថយ​ការ​លក់​កន្លង​ទៅ​ដោយសារ​បណ្ដា​ក្រុមហ៊ុន​ក្នុង​ស្រុក​វាយលុក​ចំ​គោលដៅ​អ្នក​ប្រើប្រាស់​ជាមួយ​តម្លៃ ព្រមទាំង​សមត្ថភាព។ តាម​ការ​បញ្ជាក់​ពី Samsung ឱ្យ​ដឹង​ថា តួលេខ​បញ្ជា​ទិញ​ពិត​ជា​ច្រើន​ក្រាស់ក្រែល​លើ​ចំនួន​ដែល​ខ្លួន​បាន​រំពឹងទុក​ទៅ​ទៀត។ របាយការណ៍​ចេញ​ផ្សាយ​កាលពី​ដើម​សប្ដាហ៍​នេះ ឱ្យ​ដឹង​ថា តួលេខ​បញ្ជា​ទិញ Galaxy S7 ទាំងពីរ​នៅ​លើ​ទីផ្សារ​កូរ៉េ​ខាងត្បូង​គឺ​មាន​សភាព​ល្អ​ប្រសើរ​ជាង Galaxy S6 កាលពី​ឆ្នាំ​ទៅ។ អ្នក​វិភាគ​ជឿ​ថា ចំពោះ​ទីផ្សារ​ចិន​វិញ Galaxy S7 និង S7 edge ​នឹង​មិន​ទាន់​មាន​សន្ទុះ​ខ្លាំងក្លា​អាច​វាយលុក​ទីផ្សារ​នៅ​ចិន​ខ្លាំង​ជាង Galaxy S6 នោះ​នៅ​ឡើយ​ទេ៕