ក្រុមហ៊ុន Apple បាន​បញ្ជាក់​ប្រាប់​ជា​សាធារណៈ​ហើយ​ថា ក្រុមហ៊ុន​នឹង​មាន​ព្រឹត្តិការណ៍​បង្ហាញ​សមិទ្ធផល​ថ្មីៗ ដែល​ក្នុង​នោះ​គេ​រំពឹង​ថា នឹង​មាន​វត្តមាន iPhone អេក្រង់ ៤អ៊ីញ​ថ្មី​គឺ iPhone SE។ យ៉ាងណា ក្រៅពី​ទូរស័ព្ទ iPhone ថ្មី​នេះ​ហើយ គេ​ជឿ​ថា Apple អាច​នៅ​មាន​ក្រុម​ផលិតផល​ថ្មីៗ​ជាច្រើន​ទៀត ប្រហែល ៤ ទៅ​ ៥មុខ។ ១) iPhone SE ​អេក្រង់ ៤អ៊ីញ​

ព្រឹត្តិការណ៍ Apple នៅ​សប្ដាហ៍​ក្រោយ នឹង​មិន​មែន​ជា​វេទិកា​ទូរស័ព្ទ​អេក្រង់​ធំ​នោះ​ឡើយ ពោល​ជា iPhone ថ្មី​អេក្រង់ ៤អ៊ីញ​ដែល​មាន​របាយការណ៍​ជាច្រើន​កន្លង​មក។ iPhone ថ្មី​នឹង​មាន​ឈ្មោះ iPhone SE ជា​ជំនាន់​ថ្មី​ទទួល​បាន​ការ​អភិវឌ្ឍ​បន្ត​ពី iPhone 5S ​ហើយ​លក្ខណៈ សម្បត្តិ​របស់​វា ស្ទើរ​ដូច​ទាំងស្រុង​នឹង iPhone 6S គ្រាន់តែ​មាន​ទំហំ RAM និង​អេក្រង់​តូច​ជា​ប៉ុណ្ណោះ។ iPhone SE នឹង​បំពាក់​ឈីប A9, មាន​កាមេរ៉ា​មុខ 1.2MP, កាមេរ៉ា​ក្រោយ 8MP, មុខងារ​ស្កេន​ក្រយៅដៃ Touch ID, បច្ចេកវិទ្យា NFC អាច​ប្រើ​ជាមួយ​មុខងារ Apple Pay។ បើ​តាម​គេហទំព័រ 9to5Mac ជឿ​ថា iPhone អេក្រង់​ ៤អ៊ីញ​ថ្មី​នេះ អាច​មាន​តម្លៃ​ប្រហែល ៤៥០ដុល្លារ​ប៉ុណ្ណោះ។ ២) iPad Pro ថ្មី ​អេក្រង់ ៩,៧អ៊ីញ

Apple បាន​ចេញ​លក់ iPhone Pro ​អេក្រង់ ១២,៩អ៊ីញ​កាលពី​ឆ្នាំ​មុន អម​ដោយ​លក្ខណៈ សម្បត្តិ​ខ្ពស់ និង​មុខងារ​ពិសេស ដែល​អាច​ប្រើ​ជាមួយ​ប៊ិច Apple Pen និង Smart Keyboard។ ផ្អែក​តាម​គេហទំព័រ 9to5Mac ឱ្យ​ដឹង​ថា iPad Pro គឺ​ជា​ថេប្លេត​ស៊េរី​ក្រោយ​បន្ត​ពី​ស៊េរី Air។ iPad Pro ក្រោយ​នេះ នឹង​មាន​អេក្រង់​តូច​ជាង​មុន​ពោល​គឺ ដូច​ទៅ​នឹង​ទំហំ​ស៊េរី iPad Air ៩,៧អ៊ីញ​ដែរ ប៉ុន្តែ​គ្រាន់តែ​វា​គាំទ្រ​ប៊ិច Apple Pen និង Smart Keyboard ដូច​នៅ​លើ iPad Pro ១២,៩អ៊ីញ។ ៣) ខ្សែដៃ Apple Watch ថ្មី

តាម​សេចក្ដី​រាយការណ៍​របស់​គេហទំព័រ TechCrunch ​ឱ្យ​ដឹង​ថា ក្រុមហ៊ុន​នឹង​មិន​ទាន់​សម្ពោធ​នាឡិកា Apple Watch ថ្មី​នៅ​ឡើយ​ទេ គឺ​គ្រាន់តែ​បញ្ចេញ​លក់​ខ្សែ​នាឡិកា​ស៊េរី​ថ្មី​ប៉ុណ្ណោះ។ ខ្សែ​នាឡិកា ​នឹង​មាន​ជម្រើស​ពណ៌​ថ្មី​ស្រស់​ស្អាត។ ស្រប​គ្នា​នោះ​ដែរ Apple ក៏​អាច​នឹង​បញ្ចេញ​ប្រព័ន្ធ WatchOS ថ្មី version 2.2 ​នៅ​ក្នុង​ព្រឹត្តិការណ៍​នោះ​ផង​ដែរ។ ចំណែក​នាឡិកា Apple Watch ជំនាន់​ទី២ អាច​នឹង​ត្រូវ​ក្រុមហ៊ុន​ប្រកាស​នៅ​អំឡុង​ខែ​កញ្ញា។ Apple Watch 2 នឹង​នៅ​រក្សា​មុខ​មូល​ដដែល ​គ្រាន់តែ​មាន​ការ​អាប់ដេត​ថ្មី​បន្ថែម​លក្ខណៈ​សម្បត្តិ​ដូច​ជា នឹង​មាន​កាមេរ៉ា FaceTime ជាដើម។ ៤) ប្រហែល​មាន​កំណែ​បច្ចុប្បន្នភាព​ថ្មី​លើ iOS Apple ​ក៏​នឹង​ត្រៀម​កំណែ​បច្ចុប្បន្នភាព​សូហ្វ៊ែរ iOS ​ជំនាន់ iOS 9.3 ពេញ​លក្ខណៈ ផង​ដែរ ប៉ុន្តែ​ពុំ​មាន​មុខងារ​ជា​ដុំ​កំភួន​អ្វី​ឡើយ គ្រាន់តែ​អាប់ដេត​លើ​មុខងារ TouchID។ ៥) ​ហើយ​ក៏​អាច​មាន​ការ​និយាយ​ពាក់ព័ន្ធ​នឹង​វិធីសាស្ត្រ encryption អ្នក​ប្រហែល​ជា​បាន​ឮ​ព័ត៌មាន​ជុំវិញ រឿង Apple កំពុង​ប្រឈម​មុខ​ជាមួយ​រដ្ឋាភិបាល​អាមេរិក ជុំវិញ​ករណី​តើ​គួរតែ​បំបែក​ចូល​ទូរស័ព្ទ encrypted iPhone គោលបំណង​លាតត្រដាង​ទិន្នន័យ​ ដើម្បី​បើក កកាយ​ក្រុម​ភេរវករ។ ដូច្នេះ​ព្រឹត្តិការណ៍​របស់ Apple ខាង​មុខ អាច​នឹង​ត្រូវ​ក្រុមហ៊ុន​ធ្វើការ​បកស្រាយ​ជុំវិញ​វិធីសាស្ត្រ encryption ទិន្នន័យ​នេះ៕