iPhone ​SE ​នឹង​ត្រូវ​ក្រុមហ៊ុន Apple ប្រកាស​ជា​ផ្លូវការ​នៅ​ក្នុង​ព្រឹត្តិការ​ថ្ងៃ​ទី២១ ខែ​មីនា​នេះ​ហើយ។ ចំណែក​របាយការណ៍​ថ្មី​ចុងក្រោយ​នេះ​ឱ្យ​ដឹង​ក្ដៅៗ​មក​ថា ទូរស័ព្ទ iPhone អេក្រង់ ៤អ៊ីញ​នេះ នឹង​មាន​កាមេរ៉ា​ទំហំ 12MP ដូច​កាមេរ៉ា iPhone 6S ​ដែរ ​នេះ​មាន​ន័យ​ថា វា​នឹង​មាន​សមត្ថភាព​អាច​ថត​វីដេអូ​កម្រិត 4K Ultra HD បាន។ iPhone អេក្រង់ ៤អ៊ីញ​ថ្មី​នេះ ត្រូវ​គេ​រំពឹង​ថា នឹង​មាន​លក្ខណៈ​សម្បត្តិ បំពាក់​ដោយ​ឈីប​អង្គ​ប្រតិបត្តិ Apple A9 ​អម​ដោយ RAM 2GB។ អេក្រង់​ទូរស័ព្ទ​ជា​ទាយាទ​របស់ iPhone 5S នេះ​នឹង​មាន resolution ទំហំ 1334x750px ​ហើយ​នឹង​មាន​មេម៉ូរី​ពីរ​ជម្រើស​ប៉ុណ្ណោះ​គឺ 16GB និង 64GB។ ​iPhone អេក្រង់​តូច នឹង​គាំទ្រ​ប្រព័ន្ធ​ទូទាត់​ប្រាក់​តាម​ទូរស័ព្ទ​ដៃ (mobile payment) របស់ Apple គឺ Apple Pay ​ហើយ​ក៏​គាំទ្រ​មុខងារ 3D Touch ​ផង​ដែរ។ ក្រុមហ៊ុន Apple ត្រូវ​គេ​រំពឹង​ថា នឹង​ប្រកាស​ចេញ iPhone SE ​អម​ដោយ​ជម្រើស​ពណ៌​ស្រដៀង​នឹង iPhone 6S ​ដែរ គ្រាន់តែ​បន្ថែម​ពណ៌​ថ្មី​មួយ​ទៀត​គឺ ពណ៌​ផ្កាឈូក​ស្រស់។ ​ក្រុមហ៊ុន​នឹង​រៀបចំ​ពិធី​បើក​សម្ពោធ​សមិទ្ធផល​ថ្ម​របស់​ខ្លួន​នៅ​ថ្ងៃ​ច័ន្ទ ទី២១ ​ក្នុង​ខែ​មីនា​នេះ។ គេ​រំពឹង​ថា ក្រៅពី​វត្តមាន iPhone SE ក៏​នឹង​មាន iPad Pro អេក្រង់ ៩,៧អ៊ីញ​ស៊េរី​ថ្មី​បង្ហាញ​ខ្លួន​ពេល​នោះ​ផង​ដែរ។ ផលិតផល​ថ្មី​ទាំងពីរ​នឹង ដើរ​ដោយ​ប្រព័ន្ធ​ប្រតិបត្តិការ iOS 9.3៕