​សល់​តែ ២ថ្ងៃ​ទៀត​ទេ ព្រឹត្តិការណ៍​ប្រកាស​ចេញ iPhone ​ជំនាន់​ថ្មី​ទំហំ ៤អ៊ីញ​នឹង​ត្រូវ​ប្រារព្ធ​ធ្វើ​ឡើង​ដោយ​ក្រុមហ៊ុន Apple។ ផ្អែក​តាម​គេហទំព័រ​ចិន Weibo ​ឱ្យ​ទម្លាយ​រូប​មួយ​សន្លឹក ដែល​ជា​ឯកសារ​បញ្ជាក់​លក្ខណសម្បត្តិ​របស់ iPhone SE។ អ្វី​ដែល​គេ​ឃើញ​ច្បាស់​ជាង​គេ​គឺ ទំហំ 16GB ​និង​ឈ្មោះ​របស់ iPhone អេក្រង់ ៤អ៊ីញ​នេះ គឺ iPhone SE។ បើ​តាម​របាយការណ៍​ជាច្រើន​លើកឡើង​ជុំវិញ​លក្ខណសម្បត្តិ iPhone ​ទំហំ​តូច​នេះ​ថា នឹង​មាន​អេក្រង់ ៤អ៊ីញ​ ដូច iPhone 5 និង 5S ដែរ ប៉ុន្តែ​ត្រូវ​បាន​អភិវឌ្ឍ​ឱ្យ​ទំនើប​ជាង ដោយ​ភ្ជាប់​មុខងារ​មួយ​ចំនួន​ដូច​នៅ​លើ iPhone 6S។ iPhone SE ក៏​នឹង​មាន​មុខងារ​ស្កេន​ក្រយៅដៃ​ដូច iPhone 6S។ iPhone SE ​ក៏​នឹង​មាន​ឈីប NFC គាំទ្រ​មុខងារ​បង់ប្រាក់​ទិញ​ទំនិញ​តាម​ទូរស័ព្ទ​ដៃ Apple Pay ដែរ។ ប្រភព​ដដែល​អះអាង​ថា iPhone SE នឹង​មាន​តម្លៃ​ថោក​ជាង iPhone អេក្រង់​ធំ (៤,៧អ៊ីញ និង ៥,៥អ៊ីញ) បច្ចុប្បន្ន ប៉ុន្តែ​សមត្ថភាព​មិន​ចាញ់​គ្នា​ប៉ុន្មាន​ទេ។ កន្លង​ទៅ​មាន​ការ​បែកធ្លាយ​រូប​ពាក់ព័ន្ធ iPhone SE មួយ​សំណុំ មាន​ទាំង​ប្រអប់​ថែមទៀត ចេញពី​គេហទំព័រ​បណ្ដា​ទំនាក់ទំនង​សង្គម​ចិន Weibo។ ក្រុមហ៊ុន Apple នឹង​ប្រកាស​ចេញ iPhone SE ក៏​ដូច​ជា​បណ្ដា​ផលិតផល​ផ្សេង​ទៀត នៅ​ក្នុង​ព្រឹត្តិការណ៍​ថ្ងៃ​ទី២១ មីនា​ខាង​ស្អែក​នេះ​ហើយ។ iPad Pro អេក្រង់ ៩,៧អ៊ីញ​ថ្មី ក៏​ត្រូវ​គេ​អះអាង​ថា នឹង​វែក​មុខ​នៅ​ទីនោះ​ដែរ៕