ផ្អែកតាមរបាយការណ៍ថ្មីមួយពីគេហទំព័រគួរឱ្យទុកចិត្តឱ្យដឹងថា ផេប្លេត Galaxy Note ជំនាន់ក្រោយគឺ Note 6 នឹងបង្ហាញខ្លួននៅអំឡុងខែកក្កដា ឆ្នាំ២០១៦ នេះទៀតហើយ។ Galaxy Note 6 នឹងដំណើរការដោយប្រព័ន្ធប្រតិបត្តិការជំនាន់ចុងក្រោយរបស់ Google គឺ Android N។
ក្រុមហ៊ុន Google ថ្មីៗនេះ បានបញ្ចេញប្រព័ន្ធប្រតិបត្តិការថ្មី Android N ដែលជាជំនាន់សាកល្បងសម្រាប់អ្នកអភិវឌ្ឍកម្មវិធី (Developer) យកទៅធ្វើតេស្តលើដំណើរការជាមុនសិន មុននឹងដាក់ចេញសូហ្វ៊ែរផ្លូវការឱ្យអតិថិជនប្រើ។ ដូច្នេះ គេរំពឹងថា Galaxy Note 6 នឹងជាឧបករណ៍ដែលដំណើរការជាមួយប្រព័ន្ធប្រតិបត្តិការចុងក្រោយ Android N នេះមុនគេ។
តាមសេចក្ដីរាយការណ៍កន្លងមកថា Samsung អាចនឹងចាប់ផ្ដើមសង្វាក់ផលិតកម្មឈីបផ្ទុកទិន្នន័យ UFS storage ទំហំធំ 256GB ហើយ Note 6 ក៏ត្រូវរំពឹងថា នឹងជាឧបករណ៍ដំបូងដែលមានមេម៉ូរីដល់ 256GB នេះផងដែរ។ លើសពីនេះ Galaxy Note 6 នឹងមាន RAM 6GB ធ្វើឲ្យល្បឿនដំណើរការរបស់វាកាន់តែរលូន។
ក្រុមហ៊ុន Samsung ត្រូវគេរំពឹងថា នឹងធ្វើការផលិតផេប្លេតជំនាន់ថ្មីនេះ ដោយបន្ថែមសមត្ថភាព hardware ខ្ពស់ជាងមុន ដែលអាចបំពាក់ឈីប Exynos 8990 ឬ Qualcomm Snapdragon 820 ឬក៏អាចអង្គប្រតិបត្តិជំនាន់ថ្មីរបស់ Samsung។ យើងអាចរំពឹងដែរថា Samsung នឹងប្រើសមត្ថភាពកាមេរ៉ាដូចនៅលើ Galaxy S7 មកបំពាក់លើ Note 6 ដែរ៕
