អ្វីដែលស្វាមីគួរធ្វើដើម្បីអោយភរិយាកាន់តែសប្បាយចិត្ត
ក្រុមគ្រួសារអាចមានសុភមង្គលទៅបានក៏អាស្រ័យទៅលើការចេះយល់ចិត្តគ្នានឹងការដឹងពីអ្វីដែលម្ខាងទៀតចង់បាន។ អ្នកប្រហែលជាមិនដឹងទេថារឿងតូចៗជាច្រើនដែលនឹកស្មានមិនដល់ក៏អាចធ្វើអោយភរិយារបស់អ្នកសប្បាយចិត្តផងដែរ។ ក្នុងនោះមាន៖
១) ត្រូវបង្ហាញថាស្វាមីក៏អាចធ្វើកិច្ចការរបស់ភរិយាបានដែរ៖ ប្រាកដណាស់ថាស្វាមីនិងភរិយាគឺមានការបែងចែកតួនាទីដ៏សំខាន់រៀងៗខ្លួនសម្រាប់គ្រួសារ។ ប៉ុន្តែក្នុងការធ្វើអោយដៃគូម្ខាងទៀតកាន់តែសប្បាយចិត្ត អ្នកក៏អាចជួយសម្រាលការងារខ្លះដែលមិនមែនជាតួនាទីរបស់ខ្លួនក៏បាន។
២) ត្រូវចេះស្ដាប់ពីការខ្វល់ខ្វាយរបស់នាង៖ វាអាចជារឿងមួយល្អដែលអ្នកអាចប្រើពេលខ្លះក្នុងការស្ដាប់ពីបញ្ហារបស់នាង។ ចូរចំណាយពេលខ្លះដើម្បីស្ដាប់នាង ព្រោះនាងពិតជាត្រូវការអ្នកអោយដឹងពីការខ្វល់ខ្វាយដែលនាងមាន។
៣) បង្ហាញការអរគុណដែលនាងខិតខំធ្វើជាប្រពន្ធល្អម្នាក់៖ វាអាចនឹងមិនចាំបាច់ខ្លាំងក្នុងការធ្វើបែបនេះ តែអ្នកត្រូវដឹងថាវាក៏ជាផ្នែកមួយដែលបង្ហាញពីការអរគុណរបស់អ្នកដល់រូបនាង។ នាងនឹងមានកម្លាំងចិត្ត ហើយនឹងមិននឿយហត់នោះឡើយពេលនៅជាមួយអ្នក។
៤) ព្យាយាមធ្វើអោយក្ដីស្រមៃរបស់នាងក្លាយជាការពិត៖ ការធ្វើបែបនេះបង្ហាញថាអ្នកពិតជាខ្វាយខ្វល់លើរូបនាង ហើយ អ្នកតែងនៅទីនោះដើម្បីបំពេញបំណងរបស់នាងជានិច្ច។
៥) សរសើរនិងអបអរសាទរជោគជ័យរបស់នាង៖ វាប្រហែលមិនពិបាកទេដោយគ្រាន់តែសរសើរភរិយារបស់ខ្លួនពេលនាងទទួលបានជោគជ័យ។
៦) ប្រាប់នាងថាអ្នកពិតជាស្រលាញ់នាងខ្លាំងណាស់៖ តួនាទីដ៏សំខាន់មួយទៀតគឺថាអ្នកគួរប្រាប់នាងថាអ្នកនៅតែស្រលាញ់នាងរៀងរាល់ថ្ងៃ។ នាងមិនបាននៅក្នុងចិត្តអ្នកទេ ដូច្នេះដើម្បីបង្ហាញអោយដឹងកាន់តែច្បាស់ អ្នកគួរឧស្សាហ៍ប្រាប់នាងពីពាក្យនេះទៅ។
៧) កុំខ្លាចក្នុងការសូមទោសនាង៖ ពេលអ្នកសាងកំហុសអ្វីមួយដែលអាចអោយនាងពិបាកចិត្តអ្នកត្រូវសូមទោស។ ការសូមទោសនេះមិនមែនបង្ហាញថាអ្នកណាឈ្នះឬចាញ់នោះទេ តែវាបង្ហាញពីការគោរពគ្នាទៅវិញទៅមក៕
ប្រែសម្រួល៖ ព្រំ សុវណ្ណកណ្ណិកា ប្រភព៖ www.lifehack.org
