មុនពេលហាមាត់រិះគន់នរណាម្នាក់ អ្នកត្រូវគិតឲ្យច្បាស់លើ៣ចំណុចនេះសិន!
មនុស្សភាគច្រើនតែងរិះគន់គន់គ្នាទៅវិញទៅមក លើបញ្ហាផ្សេងៗនៅក្នុងសង្គម។ ការរិះគន់ គឺពិតជាសំខាន់ដើម្បីអាចកែប្រែនូវអ្វីដែលមិនល្អ ព្រោះមនុស្សមិនងាយនឹងមើលឃើញពីចំណុចអសកម្មរបស់ខ្លួនឡើយ ដូច្នេះហើយត្រូវមានអ្នកដទៃដើម្បីជាកញ្ចក់ឆ្លុះ។
ប៉ុន្តែយ៉ាងណាក៏ដោយ ការរិះគន់ក៏ផ្តល់នូវផលវិបាកច្រើនផងដែរ ជាពិសេសការរិះគន់ដែលគ្មានមូលដ្ឋានច្បាស់លាស់ ពោលគឺការរិះគន់គ្រាន់តែដើម្បីរិះគន់ ដែលរកប្រយោជន៍មកបាន ហើយបង្កបញ្ហាថែមទៀត។ ដូច្នេះហើយ មុនពេលនិយាយរិះគន់នរណាម្នាក់ អ្នកត្រូវគិតលើ៣ចំណុចសំខាន់ៗនេះសិន៖
១) ឈរលើគោលការណ៍ «រិះគន់ដើម្បីស្ថាបនា»៖ មនុស្សភាគច្រើន ចូលចិត្តរិះគន់អ្នកដទៃ ដោយធ្វើឡើងក្នុងន័យជាន់ពន្លិចតែម្តង ដែលជាហេតុនាំឲ្យភាគីម្ខាងទៀតមិនអាចទ្រាំបាន ហើយក៏កើតជាជម្លោះផ្សេងៗ។ ការរិះគន់ដើម្បី ជាន់ពន្លិចគឺជាវប្បធម៌អាក្រក់មួយ ដែលគួរលប់បំបាត់ជាបន្ទាន់ ព្រោះថា វាមិនបានផ្តល់ប្រយោជន៍អ្វីសោះឡើយ ក្រៅពីបង្កជាបញ្ហាកើតឡើង។ ដូច្នេះហើយ មុននឹងរិះគន់នរណាម្នាក់ អ្នកត្រូវប្រាកដថា វាជាការរិះគន់ដើម្បីស្ថាបនា ដើម្បីអាចកែប្រែពីអាក្រក់មកល្អ។
២) យល់ឲ្យច្បាស់ពីសាច់រឿងសិន៖ មុនពេលនិយាយរិះគន់អ្នកដទៃ គឺត្រូវប្រាកដថា អ្នកបានដឹង និង ទទួលបានព័ត៌មានគ្រប់ជ្រុងជ្រោយអស់ហើយ ដោយដឹងច្បាស់ជា នរណាត្រូវនរណាខុស ហើយខុសដោយសារមូលហេតុអ្វី។ មនុស្សមួយចំនួន មិនទាន់ដឹងអ្វីផង ក៏ចាប់ផ្តើមស្តីឲ្យគេចុះឡើង ធ្វើដូចខ្លួនមានជំនាញខ្លាំងណាស់ ប៉ុន្តែតាមការពិតមិនដឹងអ្វីទាល់តែសោះ ដូច្នេះហើយមិនត្រឹមតែរិះគន់ដោយគ្មានប្រសិទ្ធភាពទេ តែថែមទាំងត្រូវបានគេសើចចំអកវិញទៀត។
៣) ត្រូវចាំថា អ្នកក៏ធ្លាប់ខុសដែរ៖ នរណាក៏ធ្លាប់ខុសដែរ សូម្បីតែខ្លួនអ្នកផ្ទាល់។ ដូច្នេះហើយ សូមកុំរិះគន់អ្នកដទៃខ្លាំងហួសហេតុពេក ខណៈខ្លួនឯងផ្ទាល់សាងកំហុស និង បញ្ហារាប់មិនអស់ដូចគ្នាដែរ។ វាជារឿងដ៏គួរឲ្យអៀនខ្មាសមួយ នៅពេលដែលអ្នកធ្វើបែបនេះ ព្រោះគ្មាននរណាស្តាប់អ្នកឡើយ ប្រសិនបើគេដឹងច្បាស់ពីអ្នក។ ដូច្នេះហើយត្រូវធ្វើខ្លួនឲ្យល្អជាងគេសិន មុនពេលរិះគន់។
ដោយ៖ អ៊ុន ភក្តី
