ប្រយោគ​ទាំង​៥​​ ប្រភេទ ​អាចកំណត់​ពី​​ជោគវាសនា​នៃ​​ជីវិត​​ស្នេហា​របស់​អ្នក​



ពាក្យ​សម្ដី​មួយ​ចំនួន​​ដែល​និយាយ​ចេញ​មក​ក៏​អាច​កំណត់​បាន ​ពី​វាសនា​ស្នេហា​ដែល​អ្នក​កំពុង​មាន​​ផង​ដែរ ប្រសិន​បើ​អ្នក​ដឹង​ថា​អ្វី​ខ្លះ​ដែល​អ្នក​គួរ​និយាយ​ឬ​មិន​គួរ​និយាយ ​អ្នក​ប្រហែល​ជា​មាន​សង្ឃឹម​ច្រើន​ថា​មិន​អាច​ខូច​ចិត្ត​ដោយ​សារ​ការ​បែកបាក់​ស្នេហា​ទេ។​ ខាងក្រោមនេះ ជាប្រភេទប្រយោគសំខាន់ៗ ដែលអាចកំណត់ពីជោគវាសនានៃជីវិតស្នេហារបស់អ្នក ដូច្នេះគួរជ្រើសរើសប្រយោគដែលត្រឹមត្រូវ៖ ១) ​«ខ្ញុំ​មិន​ចង់​និយាយ​រឿង​នេះ​ទេ» និង​ «ចាំ​និយាយ​គ្នា​លើក​ក្រោយ»៖ អ្នក​​ត្រូវ​តែ​គិត​ពី​ការ​និយាយ​ស្ដី​របស់​អ្នក​​នៅ​ពេល​អ្នក​កំពុង​តែ​ឈ្លោះ​គ្នា។ អ្នក​មិន​អាច​បញ្ចប់​ជម្លោះ​ដោយ​មិន​បាន​ធ្វើ​ការ​ពិភាក្សា​គ្នា​សិន​នោះ​ទេ​​​ ​វា​ហាក់​ដូច​ជា​អាត្មានិយម​ហួស​ហេតុ​ពេក។ ដូច្នេះ ជម្រើសដ៏ល្អ អ្នកគួរប្រើពាក្យថា «ចាំ​និយាយ​គ្នា​លើក​ក្រោយ» ប្រសិនបើស្ថានភាពតានតឹងពេក ជាជាងគេចវេះមិននិយាយ។ ២) ​«ខ្ញុំ​មិន​ខ្វល់​ថា​អ្នក​ចង់​ធ្វើ​អ្វី​នោះ​ទេ​» និង​ «វា​សំខាន់​ណាស់​ក្នុង​ការ​ជ្រើសរើស​ផ្លូវ​សម្រាប់​ដើររួមគ្នា»៖ ប្រសិន​បើ​អ្នក​មិន​ខ្វល់​ពី​សម្ដី​ឬ​ក៏​គំនិត​របស់​ដៃ​គូ​ស្នេហា​អ្នក​ នោះ​វា​បញ្ជាក់​ថា​ស្នេហា​នេះ​នឹង​មិន​អាច​បាន​យូរ​ត​ទៅ​ទៀត​ទេ។ ដូច្នេះហើយ អ្នកគួរតែប្រើពាក្យថា «វា​សំខាន់​ណាស់​ក្នុង​ការ​ជ្រើសរើស​ផ្លូវ​សម្រាប់​ដើររួមគ្នា» ដើម្បីឲ្យអ្នកខ្លួនអ្នក និង មនុស្សជាទីស្រលាញ់នឹកឃើញអំពីតម្លៃនៃការដើរផ្លូវរួមគ្នា។ ៣) «ខ្ញុំ​នឹង​ចាកចេញ​បើ​អ្នក​ធ្វើ​វា»​ ​និង​​​​​​​ «អ្នក​ធ្វើ​បែប​នេះ​ខ្ញុំ​មិន​អាច​ទទួល​យក​បាន​ទេ»៖ ពេល​អ្នក​កំពុង​តែ​មាន​កំហឹង​អ្នក​មិន​គួរ​និយាយ​ពាក្យ​ថា​ចាកចេញ​ ដោយ​មិន​បាន​គិត​នោះ​ទេ។ អ្នក​ត្រូវ​ទទួល​ស្គាល់​ថា​អ្នក​មិន​អាច​ទទួល​យក​បាន​ទេ​នូវ​​​ទង្វើ​អ្វី​មួយ តែ​ហាម​ដាច់​ខាត​ប្រើប្រាស់​ពាក្យ​ចាកចេញ។ ៤) «​អ្នក​មិន​ដូច​សង្សារ​ចាស់​ខ្ញុំ​ទេ»​ និង​​ «​ខ្ញុំ​មិន​សូវ​ចូលចិត្ត​ចារិក​នេះ​ទេ»៖ គ្មាន​នរណា​ម្នាក់​ចង់​អោយ​សង្សារ​របស់​ខ្លួន​ធ្វើ​ការ​ប្រៀបធៀប​ទៅ​នឹង​សង្សារ​ចាស់​ទេ។ អ្នក​មិន​ចូល​ចិត្ត​អ្វី​មួយ​អ្នក​គូរ​ប្រាប់​ដើម្បី​អោយ​មាន​ការ​ផ្លាស់ប្ដូរ តែ​ហាម​ដាច់​ខាត​ធ្វើ​ការ​ប្រៀបធៀប​​ទៅ​នឹង​អ្នក​ដទៃ។ ៥) «ខ្ញុំ​ស្រលាញ់​អ្នក​ប្រសិន​បើ​អ្នក​ធ្វើ​បែប​នេះ​»​ ​និង​ «ខ្ញុំ​ស្រលាញ់​អ្វី​ដែល​អ្នក​មាន»៖ អ្នក​មិន​អាច​ស្រលាញ់​នរណា​ម្នាក់​ដោយ​ដាក់​លក្ខខណ្ឌ​ ឬ​ក៏​ដាក់​​កម្រិត​ណា​មួយ​ទេ។​ អ្នក​ស្រលាញ់​ដោយ​សារ​តែ​គេ​​ជា​ប្រភេទ​មនុស្ស​​​ដែល​អ្នក​ចង់​បាន​៕​ ប្រែ​សម្រួល៖ ព្រំ សុវណ្ណកណ្ណិកា ប្រភព៖ www. powerofpositivity.com