ដឹងទេថាមីយ៉ាន់ម៉ាជាប្រទេសមានចិត្តសប្បុរសបំផុតក្នុងលោកឆ្នាំនេះ?
មូលនិធិជំនួយសប្បុរសធម៌ ដែលមានឈ្មោះជាភាសាអង់គ្លេសថា The Charities Aids Foundation ទើបនឹងចេញ របាយការណ៍ប្រចាំឆ្នាំមានឈ្មោះថា "សន្ទស្សន៍សម្បទានពិភពលោកប្រចាំឆ្នាំ២០១៥" (2015 World Giving Index) ដែលបង្ហាញពីប្រទេសមានចិត្តសប្បុរសបំផុតក្នុងលោក (The Most Charitable Countries)។
តាមរបាយការណ៍ នៅក្នុងឆ្នាំ២០១៥នេះ សហរដ្ឋអាមេរិកបានធ្លាក់មកលេខពីរ ខណៈប្រទេសដែលជាប់លេខមួយបានទៅលើមីយ៉ាន់ម៉ា។ ជាប់លេខមួយនៅពេលនេះ គឺមានន័យថា មីយ៉ាន់ម៉ានៅឈរលេខមួយក្នុងលោកខាងបរិច្ចាគថវិកា (donating money)។ មិនត្រឹមតែជាប់លេខមួយខាងបរិច្ចាគថវិកាទេ ប៉ុន្តែប្រទេសនេះក៏ជាប់លេខមួយចំពោះការងារស្ម័គ្រចិត្តផងដែរ (ពេលវេលាចំណាយការងារស្ម័គ្រចិត្តច្រើនបំផុតក្នុងលោក)។ តាមរបាយការណ៍ដដែលឱ្យដឹងទៀតថា ដោយសារតែប្រទេសនេះប្រកាន់ខ្ជាប់ខ្ជួននូវព្រះពុទ្ធសាសនាថេរវាទ ដូច្នេះបានជាប្រជាជនប្រទេសនេះចូលចិត្តបរិច្ចាគទាំងថវិកា និងពេលវេលាចំពោះព្រះសង្ឃ ដូនជី និងថែរក្សាប្រាសាទ។ មូលនិធិខាងលើបានវាយតម្លៃទៅលើប្រទេសចំនួន ១៤៥ ក្នុងលោក ខណៈអង្គការនេះមានការិយាល័យគ្របដណ្ដប់នៅទ្វីបចំនួន ៦ និងមានការិយាល័យធំនៅប្រទេសអង់គ្លេស៕ ដោយ៖ រតនៈវិភូ ប្រភព៖ Business Insider
