​ពួក​ISIS​មាន​​ប្រភព​ចំណូល​ធំៗ​​១០​យ៉ាង​ ​​​​​ជាហេតុ​នាំ​ឲ្យ​ពួកគេ​មិន​ងាយ​រលាយ​ដោយ​ងាយ​ឡើយ​​



​ក្រុម​រដ្ឋ​ឥស្លាម​ISIS ​​កំពុង​បង្ក​បញ្ហា​ស្មុគស្មាញ​យ៉ាង​ខ្លាំង​​ ​ក្នុង​ប្រទេស​ស៊ីរី​ ​និង អ៊ីរ៉ាក់​ព្រោះ​ពួកគេ​ចង់​បង្កើត​រដ្ឋ​មួយ​ឲ្យ​បាន​ឆាប់ៗ​ខាង​មុខ​។ ​ថ្វីត្បិត​តែ​សហរដ្ឋអាមេរិក​ ​និង សម្ព័ន្ធ​មិត្ត​បាន​វាយប្រហារ​​អស់​ជាង​១​ឆ្នាំ​ក្តី ​​ប៉ុន្តែ​​នៅ​តែ​មិន​អាច​លុបបំបាត់​​ពួក​ឥស្លាម​ជ្រុលនិយម​ទាំង​អស់​នោះ​ ​​ដោយ​ងាយ​ឡើយ​។​ ​លើស​ពី​នេះ​ទៀត​ ​ពួក ISIS​​ក៏​បង្ក​ការ​គំរាមកំហែង​ដល់​សន្តិសុខ​ពិភពលោក​ផង​ដែរ ​​ជាក់ស្តែង​ករណី​អំពើ​ភេរវកម្ម​នៅ​បារាំង​​ជា​ឧទាហរណ៍​ស្រាប​។ ​ខាង​ក្រោម​នេះ​ ​គឺ​ជា​​ប្រភព​សំខាន់ៗ​ទាំង​១២​យ៉ាង​ដែល​ជួយ​ឲ្យ​ក្រុម​នេះ​ ​មាន​លុយ​ជាច្រើន​ដើម្បី​បន្ត​ពង្រឹង​ឥទ្ធិពល​៖ ១) ប្រេង៖ ​ចាប់តាំង​ពី​ក្រុម​ISIS ​បាន​ចូល​កាន់កាប់​ប្រទេស​ស៊ីរី​ ​និង ​អ៊ីរ៉ាក់​មក​ ​មាន​អណ្ដូងប្រេង និង រោងចក្រ​ចម្រាញ់​ប្រេង​ជាច្រើន​កន្លែង​ត្រូវ​បាន​ពួក​ជ្រុលនិយម​ទាំង​នោះ រឹបអូស​យក​ ​ហើយ​បាន​លក់​ប្រេង​ខុស​ច្បាប់​​ទៅ​កាន់​ទីផ្សារ​ងងឹត​ ​បាន​លុយ​ជាច្រើន។ ​២) បង្ខំ​​ឲ្យ​ប្រជាជន​បង់ពន្ធ៖ ​បើ​តាម​ការស្រាវជ្រាវ​របស់​អ្នក​ជំនាញ​ឲ្យ​ដឹង​ថា ​ក្រុម ISIS​បាន​បង្ខំ​ឲ្យ​ប្រជាជន​នៅ​តំបន់​ដែល​ស្ថិត​ក្រោម​ការគ្រប់គ្រង​របស់​ខ្លួន​ ​បង់ពន្ធ​ក្នុង​តម្លៃ​ខ្ពស់​ ​​ដើម្បី​យក​លុយ​ទាំង​នោះ​ទៅ​បន្ត​ប្រតិបត្តិការ​របស់​ខ្លួន​។ ​ប្រសិនបើ​ ​ប្រជាជន​មិន​បង់​ពន្ធ​តាម​ការ​កំណត់​នោះ​ទេ ​​​​នឹង​ត្រូវ​ប្រឈម​នឹង​ទណ្ឌ​កម្ម​ធ្ងន់ធ្ងរ​​មិន​ខាន​។ ៣) ​ចាប់ជំរិត​៖ ​ជា​ទូទៅ​ក្រុម​ISIS នេះ​តែង​ចាប់ជំរិត​​មនុស្ស​ជាច្រើន​ ​ដើម្បី​ទារប្រាក់​ជា​ថ្នូរ​នឹង​ការ​ដោះលែង​ ​ហើយ​មាន​ចំណាប់ខ្មាំង​ជាច្រើន​ក៏​ត្រូវ​បាន​សម្លាប់​ផង​ដែរ​។ ៤) ​កាន់កាប់​ធនាគារ​អ៊ីរ៉ាក់​៖​ ​កាល​ពី​ឆ្នាំ​២០១៤​ ​ក្រុម​ISIS បាន​រឹបអូស​យក​សាខា​ធនាគារ​ជាតិ​របស់​អ៊ីរ៉ាក់​ជាច្រើន​កន្លែង ​​ហើយ​​ក្នុង​នោះ​ពួកគេ​ក៏​ទទួល​បាន​ប្រាក់សុទ្ធ​ប្រមាណ ៥០០ ​លាន​ដុល្លារ​អាមេរិក​ផង​ដែរ​។ ៥) ​លក់​ទ្រព្យ​សម្បត្តិ​​ផ្សេងៗ​​ដែល​រឹបអូស​បាន​ក្នុង​ពេល​​ធ្វើ​សង្គ្រាម​៖ ​ក្នុង​ពេល​វាយ​ប្រយុទ្ធ​គ្នា​ម្តងៗ​ ​ក្រុមISIS​តែង​ប្រមូល​យក​​របស់របរ​ជាច្រើន​ ​ជាពិសេស​យានយន្ត​​ ​និង ​​គ្រឿង​សព្វាវុធ​របស់​​កងកម្លាំង​រដ្ឋាភិបាល​អ៊ីរ៉ាក់ ​និង ​ស៊ីរី ​ដើម្បី​លក់​ក្នុង​តម្លៃ​ណាមួយ​។ ​តាមរយៈ​​សកម្ម​ភាព​នេះ​ ​ក្រុមISIS​ក៏​ទទួល​បាន​ប្រាក់​ជាច្រើន​ផង​ដែរ​។ ៦) ​ជួល​ ​ឬ​ ​លក់​អចលនទ្រព្យ​៖​ ​​បើ​តាម​របាយការណ៍​ស្រាវជ្រាវ​ជាច្រើន​បង្ហាញ​ថា ក្រុមISIS​បាន​កាន់កាប់​ ​ដីធ្លី​ ​និង ​អាគារ​ ​និង​​ ​ផ្ទះ​ជាច្រើន​នៅ​តំបន់​ដែល​​ពួកគេ​កាន់កាប់​។ ដូច្នេះ​ពួក​ជ្រុលនិយម​ទាំង​នោះ​តែងតែ​ជួល​ ​ឬ​ ​​លក់​​ក្នុង​តម្លៃ​ណាមួយ​ ​ហើយ​ប្រមូល​ប្រាក់​ទុក​ដើម្បី​ចំណាយ​លើ​ប្រតិបត្តិការ​របស់​ខ្លួន​។ ៧) ​ការ​ឧបត្ថម្ភ​ពី​សមាជិក​បរទេស៖ ​​មាន​ជនបរទេស​ជាច្រើន​មក​ពី​ជុំវិញ​ពិភពលោក​ ​បាន​ចូលរួម​ជាមួយ​នឹង​ចលនា​បង្កើត​រដ្ឋ​របស់​ក្រុម​ISIS​ ​ហើយ​ពូក​គេ​បាន​នាំ​មក​​ជាមួយ​នូវ​ប្រាក់​ជាច្រើន​ដើម្បី​​គាំទ្រ​ចលនា​នេះ​។ ​ចំពោះ​អ្នក​ដែល​មិន​អាច​មក​ចូលរួម​ក្នុង​ចលនា​នេះ​បាន​ ​ពួកគេ​ក៏​បាន​ចំណាយ​ប្រាក់​ជាច្រើន​ដើម្បី​ឧបត្ថម្ភ​​ផង​ដែរ​។ ​ ៨) ​​​កសិកម្ម​៖ ​ក្រុម​ISIS ​​បាន​កាន់កាប់​ផ្ទៃដី​ដែល​ដែល​សម្បូរ​ទៅ​ដោយ​​ជីជាតិ​​ជាច្រើន​ ​នៅ​ក្នុង​ប្រទេស​ស៊ីរី​ ​និង ​អ៊ីរ៉ាក់​ ​ដែល​​សក្ដានុពល​​ក្នុង​ការ​ផលិត​ស្រូវសាលី​។ បើ​តាម​ការ​ចុះផ្សាយ​របស់​សារព័ត៌មាន Reuters​ ​ទិន្នផល​​​ភាគច្រើន​ដែល​ ​លក់​ក្នុង​ទីផ្សារ​ងងឹត​នោះ​​គឺ​បញ្ចុះ​តម្លៃ​រហូត​ដល់​៥០​ភាគរយ​ ​ដូច្នេះ​ហើយ​ពួក​ឈ្មួញ​តែង​ប្រមូល​ទិញ​យក​គ្មាន​សល់​។ ​ជា​រៀងរាល់​ឆ្នាំ​​​ក្រុម​ISIS​អាច​ទទួល​បាន​ចំណូល​ប្រហែល​២០០​លាន​ដុល្លារ​អាមេរិក​។ ​​ ៩) ​ការ​ជួញដូរ​​មនុស្ស​៖​ ​ពួក​ជ្រុលនិយម​ទាំង​នោះ ​បាន​​ទិញ​ដូរ​មនុស្ស​​យ៉ាង​សេរី​បំផុត​ ​នៅ​តំបន់​ដែល​ពួកគេ​កាន់កាប់ ​ជាពិសេស​កុមារ​ ​និង ស្ត្រី។ ១០) ​លក់​វត្ថុបុរាណ​៖ ​ក្រុម ISIS​បាន​កាន់កាប់​សារមន្ទីរ​ ​និង​ ​ទីក្រុង​បុរាណ​ជាច្រើន​កន្លែង ​ហើយ​ពួក​គេ​តែងតែ​​លក់​វត្ថុបុរាណ​​មាន​តម្លៃ​​ទៅ​កាន់​ទីផ្សារ​ងងឹត​៕ ​​ដោយ៖ រតនា​ ​វិចិត្រ​ ​ប្រភព៖ agenda.weforum.org ​​​​​​​​ ​​​​​​