ក្រុមហ៊ុនរៀបចំដំណើរទេសចរណ៍ធំៗរុស្ស៊ី លុបចោលកញ្ចប់ដំណើរកម្សាន្តទៅទួរគី ក្រោយមានហេតុការណ៍បាញ់ទម្លាក់យន្តហោះរុស្ស៊ី
ក្រុមហ៊ុនរៀបចំដំណើរទេសចរណ៍ធំៗរបស់រុស្ស៊ី បានប្រកាសលុបចោលការរៀបចំកញ្ចប់ដំណើរកម្សាន្តជាច្រើនរបស់ខ្លួនទៅកាន់ប្រទេសទួរគី ក្រោយពេលមានហេតុការណ៍បាញ់ទម្លាក់យន្តហោះរុស្ស៊ីកាលពីព្រឹកថ្ងៃអង្គារកន្លងទៅ។
ប្រតិបត្តិករទេសចរណ៍ជាច្រើនរបស់រុស្ស៊ី មានដូចជា Pegas Touristik, Natalie Tours, Biblio Globus និង Tez Tour បានប្រកាសព្រមៗគ្នាថា ក្រុមហ៊ុនរបស់ខ្លួនបញ្ចប់កញ្ចប់ដំណើរកម្សាន្តពីប្រទេសរុស្សីទៅកាន់ទួរគី ដែលនាំឲ្យទួរគីរងនូវផលប៉ះពាល់ខ្លាំង។
ជនជាតិរុស្ស៊ី គឺជាភ្ញៀវទេសចរសំខាន់បំផុតរបស់ទួរគី ហើយប្រទេសនេះក៏ពឹងខ្លាំងលើវិស័យទេសចរណ៍ផងដែរ ពោលគឺស្មើនឹង១១ ភាគរយនៃផលិតផលក្នុងស្រុកសរុប (GDP) មានតម្លៃ១៧០ ពាន់លានដុល្លារអាមេរិក។
ក្រោយពេលមានហេតុការណ៍បាញ់ទម្លាក់យន្តហោះរុស្ស៊ីនៅក្បែរព្រំដែនស៊ីរី-ទួរគីភ្លាម លោកSergey Lavrov រដ្ឋមន្ត្រីការបរទេសរុស្ស៊ីបានសម្រេចលុបចោលដំណើរទស្សនកិច្ចទៅកាន់ប្រទេសទួរគី ហើយទំនាក់ទំនងរវាងប្រទេសទាំងពីរចាប់ផ្តើមតានតឹងខ្លាំង៕
ដោយ៖ រតនា វិចិត្រ
ប្រភព៖ www.rt.com
